اسلام آباد۔1مارچ(اے پی پی) وزیراعظم محمد شہباز شریف 20 ارب روپے دے رمضان ریلیف پیکج دا افتتاح کرݙتے جیڑھا جو گزریل سال 7 ارب دے پیکج دے مقابلے اچ 3 گنا ودھ اے ، پیکج دے تحت پورے ملک دے 40 لکھ مستحق خانداناں کوں شفاف تے سوکھے طریقے نال ڈیجیٹل والٹ دے ذریعے 5 ہزار روپے فی خاندان ݙتے ویسن ۔ رمضان ریلیف پیکج 2025دے اجرا ء دی تقریب منعقد تھئی، وزیراعظم بٹن دبا تے ڈیجیٹل والٹ دا افتتاح کیتے۔تقریب اچ وفاقی وزراء راناتنویرحسین،عطاء اللہ تارڑ،احسن اقبال ، علی پرویزملک ، شزافاطمہ خواجہ تے گورنراسٹیٹ بینک اتے ٻئے اعلیٰ حکام شرکت کیتی۔تقریب اچ رمضان پیکج2025دے حوالے نال خصوصی دستاویزی فلم ݙکھائی ڳئی جݙاں جو وزارت اطلاعات ونشریات دی طرفوں رمضان پیکج تے بݨائی ڳئی خصوصی تعارفی ویڈیووی ݙکھائی ڳئی۔ وزیراعظم تقریب توں خطاب کریندے آکھیے ماہ صیام اچ 40 لکھ گھراݨے تے 2 کروڑ مستحق لوکاں کوں ڈیجیٹل والٹ دے ذریعے فی خاندان 5 ہزار روپے ݙیوݨ دا انتظام کیتا ڳئے انہاں آکھیے ایجھے طبقے جیڑھے سفید پوش ہن تے کہیں دے اڳوں ہتھ نی ݙیندے انہاں دی مدد کیتی ویسی اڄوکے سال تقریبا ً20 ارب روپے دی خطیر رقم ایں پیکج سانڳے رکھی ڳئی اے ۔ وزیراعظم آکھیے گزریل سال اے رقم 7 ارب روپے ہئی جیں کوں ودھا تے 20 ارب کرݙتا ڳئے ۔ وزیراعظم آکھیے ڈیجیٹل والٹ دے ذریعے شفاف طریقے نال ماہ رمضان دے پہلے عشرے اچ 20 ارب روپے ݙتے ویسن تے ھک ݙھیلے دی کرپشن دا شک نہ ہوسی ۔ انہاں آکھیے ملک دے چارے پاسے ھک شفاف نظام دے ذریعے اے پیکج ونڈیا ویسی جیں دی مکمل نگرانی کیتی ویسی ۔وزیراعظم ایں پروگرام اچ تکنیکی مدد ݙیوݨ تے سٹیٹ بینک آف پاکستان ، نادرا ، بی آئی ایس پی ، وزارتاں اتے ٹیک کمپنیز تے بین الاقوامی ماہرین دا شکریہ ادا کیتے جنہاں ݙینھ رات محنت کرتے اے نظام متعارف کرائے ۔ وزیراعظم وزیر خزانہ تے چوہدری امداد بوسال دا وی شکریہ ادا کیتے ۔ انہاں مدرسہ حقانیہ اکوڑہ خٹک اچ دھماکے دی مذمت کریندے مولانا حامدالحق اتے ٻئے لوکاں دی شہادت تے تعزیت کیتی ۔ انہاں آکھیے حامد الحق دا مدرسہ دینی تعلیمات دے حوالے نال ھک اعلیٰ مقام رکھیندا ہئی انہاں آکھیے اساں سارے ایں افسوسناک واقعہ دی شدید مذمت کریندوں تے امید کریندوں جو کے پی حکومت واقعہ اچ ملوث عناصر دے خلاف کارروائی کریندے ذمہ واراں کوں قرار واقعی سزا ݙیسی۔ وزیراعظم آکھیے 2018 اچ دہشتگردی منڈھوں مک ڳئی ہئٰ جیں سانڳے 80 ہزار توں ودھ شہریاں ، افواج پاکستان دے نینگراں ، افسراں، عام شہریاں شہادتاں ݙتیاں لیکن اڄوکے ݙینھاں اچ دہشتگردی ول سر چاتے ، ماہ رمضان دی برکت تے پاکستان دے 24 کروڑ عوام دیاں دعائیں تے مسلح افواج دی عظیم قربانیاں دے طفیل ھک واری ول دہشتگردی کوں مکایا ویسی تے اساں ایں ناسور کوں ول دفن کرݨ تئیں آرام نال نہ ٻہسوں ۔ انہاں آکھیے کئی سو ارب دے محصولات دے زیر التوا کیس ہن تے کرپشن دے ذریعے غریباں دا پیسہ لٹیاں ڳئے ایں نال اوکھے ہتھاں نال نبڑدے پیوں ۔ روپے اتے ڈالر دی قدر اچ ٻہوں فرق آڳیا ہئی ، اساں جݙاں ملوث عناصر دے خلاف کارروائی کیتی تاں لوک عدالتاں توں حکم امتناعی گھن آئے ۔ انہاں آکھیے اساں نواں نظام بݨائے تاں جو ایں اوکھے چیلنج تے قابو پاتا ونڄ سڳےاساں ونڈ فال ٹیکس دے حوالے نال نویں قانون دے تحت 500ارب روپے واپس گھن آوݨ دا ہدف مقرر کیتے ۔ ایں دی شروعات سندھ ہائی کورٹ دے حکم امتناعی ختم کرݨ توں تھی ڳئے تے گورنر سٹیٹ بینک کوں خراج تحسین پیش کرینداں جیڑھے ھک ݙینھ اچ 23 ارب روپے بینکاں اچ واپس گھن آئے ۔ چیئرمین ایف بی آر اتے ٻئے اداریں دا وی کردار قابل تعریف اے ۔ ایں موقع تے وزیراعظم ماہ رمضان دی برکت نال ملک تے قوم دی ترقی ، سلامتی اتے خوشحالی سانڳے دعا وی منڳی ۔ ایندے توں پہلے وفاقی وزیر صنعت وپیداوار رانا تنویر حسین پروگرام دے حوالے نال بریفنگ ݙتی تے آپݨے خطاب اچ آکھیے اے پروگرام صرف 20 ݙینھ اچ سارے متعلقہ اداریں ݙینھ رات محنت نال تیار کیتے جیڑھا جو ماہ رمضان اچ مستحق لوکاں کوں ریلیف ݙیسی۔ انہاں آکھیے شفاف ترین طریقہ کار دے ذریعے 40 لکھ مستحق خانداناں کوں پورے ملک اچ ڈیجیٹل والٹ دے ذریعے سوکھی ونڈ کوں یقینی بݨایا ڳئے تاں جو لوک باوقار طریقے نال اے امداد گھر اچ گھن سڳن ۔ ایں توں انڄ کھنڈ دی ارزاں نرخاں تے ݙیوݨ یقینی بݨایا ویندا پئے تے تحصیل دی سطح تے شوگر ملز مالکان دی طرفوں 600 سٹالز لاتے ویسن جتھاں کھنڈ 130 روپے فی سیر دے حساب نال ݙتی ویسی ۔ یوٹیلٹی سٹورز کوں سبسڈی ݙیوݨ دی بجائے ہدایت کیتی ڳئی اے جو ساریاں کھاوݨ پیوݨ دیاں چیزاں مقررہ قیمتاں نال 15 فیصد رعایت تے ݙتیاں ونڄن۔
