سنگاپور ۔1مارچ (اے پی پی) ڈپٹی چیئرمین سینیٹ سیدال خان سنگاپوراچ پاکستان دے ہائی کمیشن دا دورہ کیتے۔ ایں موقع تے پاکستان دی ہائی کمشنر رابعہ شفیق انہاں کوں پاکستان تے سنگاپور وچال سفارتی و تجارتی تعلقات تے بریفنگ ݙتی ۔ انہاں سنگاپور توں حلال گوشت دی سرٹیفیکیشن گھنݨ سانڳے جاری کوششاں دا وی ݙسائے ، جیں توں پاکستان دے گوشت دی برآمدات ودھ سڳسی ۔ سینیٹ سیکرٹریٹ توں جاری بیان موجب ڈپٹی چیئرمین سیدال خان پاکستان خصوصاً بلوچستان دے معدنیات و کان کنی دے شعبے اچ سرمایہ کاری دے وسیع موقع تے زورݙتا۔ انہاں آکھیے بلوچستان معدنی وسائل توں مالا مال اے اتے غیر ملکی سرمایہ کاری سانڳے بہترین امکانات رکھیندے ۔ ایں توں انڄ انہاں بین الاقوامی منڈیاں اچ پاکستان دے اعلیٰ معیار دے پھل، خشک میوہ جات اتے زرعی اجناس کوں ودھارا ݙیوݨ دی لوڑھ تے وی زور ݙتے۔دورے دے دوران، ڈپٹی چیئرمین ہائی کمیشن دے مختلف دفتراں دا معائنہ کیتے، جتھاں انہاں قونصلر خدمات اتے سنگاپور اچ مقیم پاکستانی برادری کوں ݙتیاں ونڄݨ آلیاں سہولتاں دا جائزہ ڳھدے ۔ بعد اچ، انہاں ہائی کمیشن دی وزیٹر بک اچ آپݨے تاثرات وی قلمبند کیتے۔
