اسلام آباد۔2مارچ (اے پی پی) محکمہ موسمیات زور دا مینھ وسݨ دی وارننگ جاری کریندے شہریاں کوں مشورہ ݙتے جو او آپݨی حفاظت یقینی بݨاوݨ سانڳے احتیاط ورتن ، بشمول چھل آلے علاقیں دا سفر نہ کرن ، زور دا مینھ وسݨ ویلھے گھراں اندر رہݨ تے مقامی حکام دی طرفوں انخلا دے احکامات تے عمل کرن۔ اتوار کوں نجی ٹی وی دی رپورٹ موجب گھٹ دباؤ دا نظام شمالی علاقیں اچ اڄ اتوار تے صبحائیں زور دا مینھ وسݨ تے برف باری دا باعث بݨسی ۔پنجاب اچ زور دا مینھ وسݨ دا امکان اے جݙاں جو خیبرپختونخوا دے میدانی اتے پہاڑی علاقیں اچ 4 مارچ تئیں مینھ تے برف باری تھیسی ۔مقامی حکام کوں وی ہائی الرٹ کیتا ڳئے ۔مری تے گلیات سودھے پہاڑی علاقیں اچ وی مینھ تے برف باری دی پیشگوئی کیتی ڳئی اے ۔محکمہ موسمیات مزید آکھیے طاقتور مغربی موسمی نظام اڄ بلوچستان اچ داخل تھیوݨ دا امکان اے جئیں توں کھمݨ نال طوفانی مینھ وسسی تے پہاڑی علاقیں اچ برف باری تھیسی ۔ صوبائی ڈیزاسٹر مینجمنٹ اتھارٹی (پی ڈی ایم اے ) مسافراں اتے سیاحواں کوں مشورہ ݙتے جو او برفباری، طوفان اتے آوݨ آلی چھل دے دوران غیر ضروری سفر نہ کرن۔
