اسلام آباد۔2مارچ(اے پی پی) وزیراعظم محمد شہبازشریف رمضان المبارک اچ کھنڈ تے ٻیاں کھاوݨ پیوݨ دیاں چیزاں مناسب قیمتاں تے ݙیوݨ سانڳے حکمت عملی بݨاوݨ ، کھنڈ دیاں قیمتاں کنٹرول کرݨ دے حوالے نال سخت اقدامات چاوݨ تے ذخیرہ اندوزی اچ ملوث عناصردے خلاف سخت کارروائی کرݨ دی ہدایت کریندے آکھیےعوام کوں کھاوݨ پیوݨ دیاں چیزاں ارزاں نرخاں تے ݙیوݨ حکومت دی اولین ترجیح اے ۔وزیراعظم دفتر میڈیا ونگ توں جاری بیان موجب وزیراعظم محمد شہباز شریف دی صدارت اچ پورے ملک اچ کھنڈ دی سپلائی تے قیمت کنٹرول کرݨ دے حوالے نال اجلاس تھئے ۔ وزیراعظم آکھیے گزریل مہینے اچ حکومت کھنڈ دی سمگلنگ تے سخت کارروائی کیتی جیں توں کھنڈ دی سمگلنگ مکاوݨ اچ مدد ملی ،وفاقی تے صوبائی حکومتاں رل تے عام آدمی کوں سستیاں کھاݨ پیوݨ دیاں چیزاں ݙیوݨ یقینی بݨاون ، مضان المبارک اچ کھنڈ تے ٻیاں ضروری چیزاں دیاں قیمتاں کوں کنٹرول کرݨ سانڳے کوئی وسلائی برداشت نہ کیتی ویسی ۔اجلاس کوں کھنڈ دی یداوار دے حوالے نال بریفنگ ݙتی ڳئی۔بریفنگ اچ ݙسایا ڳئے جو ایں ویلھے ملک اچ کھنڈ دا وافر سٹاک موجود اے۔صوبائی سطح تے کھنڈ دی ارزاں نرخاں تے وکامت سانڳے فئیر پرائس شاپس بݨائیاں ڳئن ۔ بریفنگ اچ اے وی ݙسایا ڳئے جو کھنڈ دی سمگلنگ منڈھوں مکاوݨ سانڳے تکڑے اقدامات چاتے ویسن تے سمگلرز دے خلاف سخت کاروائی کیتی ویسی ۔صوبائی چیف سیکرٹریزاجلاس کوں بریفنگ اچ ݙسائے جو کھنڈ دی غیر قانونی ذخیرہ اندوزی دے خلاف کارروائی یقینی بݨائی ویسی ایں حوالے نال ضلعی انتظامیہ تکڑی تھی تے کم کریسی ۔ اجلاس اچ نائب وزیراعظم تے وزیر خارجہ سینیٹراسحاق ڈار ، وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر صنعت و پیداوار و قومی غذائی تحفظ رانا تنویر حسین ، وفاقی وزیر علی پرویز ملک اتے متعلقہ اعلیٰ سرکاری افسراں شرکت کیتی ۔چارے صوبیں دے چیف سیکرٹریز بذریعہ وڈیو لنک اجلاس اچ موجود ہن۔
