اسلام آباد۔3مارچ (اے پی پی) انٹرنیشنل کرکٹ کونسل ولوں آئی سی سی چیمپئنز ٹرافی دا نانواں ایڈیشن پاکستان اچ جاری اے جئیں اچ شائقین کرکٹ کوں دلچسپ مقابلے ݙیکھݨ کوں ملدے پئن۔ آئی سی سی چیمپئنز ٹرافی دا پہلا سیمی فائنل میچ کل منگل کوں کھیݙیا ویسی جئیں اچ آسٹریلیا اتے بھارت دی ٹیماں دبئی انٹرنیشنل کرکٹ سٹیڈیم ، دبئی اچ کھیݙسن۔ آسٹریلیا دی ٹیم کوں مایہ ناز بلے باز سٹیو سمتھ لیڈ کریسن جڈانجو بھارتی کرکٹ ٹیم مایہ ناز اوپننگ بلے باز روہت شرما دی قیادت اچ کھیݙسی۔ اے میچ ڈے اینڈ نائٹ ہوسی اتے پاکستان دے معیاری ویلھے مطابق ݙینھ ݙو وڄے شروع تھیسی۔ آئی سی سی چیمپئنز ٹرافی دا ݙوجھا سیمی فائنل میچ 5 مارچ کوں جنوبی افریقا اتے نیوزی لینڈ دی ٹیماں وچال قذافی سٹیڈیم ، لاہور اچ کھیݙیا ویسی۔ ݙو فائنلسٹ ٹیماں وچال فائنل میچ نو مارچ کوں کھیݙیا ویسی۔
