اسلام آباد۔4مارچ (اے پی پی) کرغزستان دے سفیر آواز بیک اتاخانوف وفاقی وزیر برائے توانائی سردار اویس احمد خان لغاری نال ملاقات کیتی، ملاقات اچ ݙوپاسہ تعلقات کوں ٻیا مضبوط ٻݨاوݨ اتے خصوصی طور توانائی دے شعبے اچ تعاون دے امکانات تے ڳالھ کیتی ڳئی۔ منگل کوں ترجمان پاور ڈویژن توں جاری بیان موجب ایں موقع تے ݙوہیں فریقاں توانائی سودھے مختلف شعبیاں اچ آپسی سانجھ کوں ودھاوݨ دا عزم کیتا۔ وفاقی وزیر پاکستان اتے کرغزستان وچال مثالی برادرانہ تعلقات دا ذکر کریندیں ہوئیں مختلف شعبیاں اچ تعاون کوں ودھاوݨ دی خواہش کیتی۔ کرغزستان دے سفیر پاکستان اچ توانائی دے شعبے اچ اصلاحات دی کوششاں دی تعریف کیتی۔ ملاقات اچ ݙوہیں رہنماواں آپسی تعاون ودھاوݨ دا عزم کیتا۔
