اسلام آباد۔4مارچ (اے پی پی) نائب وزیراعظم اتے وزیر خارجہ سینیٹر محمد اسحاق ڈار ملک کوں ترقی دی راہ تے ٹورݨ کیتے سانجھی کوششاں تیز کرݨ تے زور ݙیندیں ہوئیں آکھیا جو حکومت آپݨی کوششاں نال ملکی معیشت کوں اڳوں ودھاوݨ کیتے پرعزم اے۔ ساری سٹاک مارکیٹاں دے انضمام دے بعد پاکستان سٹاک ایکسچینج اڄ اچائی تے اے۔ ملک کوں اڳوں ڳھن ونجݨ اساں ساریاں دی ذمہ واری اے۔ اے ڳالھیں انہاں منگل کوں مسابقتی کمیشن آف پاکستان دے ہیڈ آفس دے منڈھ بدھݨ دی تقریب توں خطاب کریندیں ہوئیں آکھی۔ انہاں آکھیا جو ملک اچ ترقی اتے اڳوں ودھݨ دے امکانات موجود ہن۔ حکومت سارے شعبیاں اچ انہاں امکانات کوں ڳولݨ کیتے کم کریندی پئی اے۔ نائب وزیراعظم آکھیا جو معیشت اچ بہتری امدی پئی اے اتے ملک ترقی دی راہ تے ویندا پئے۔ انہاں آکھیا جو معیشت دی بہتری کیتے نینگر آپݨی صلاحیتاں استعمال کرن۔ دشمن پاکستان کوں ڈیفالت ݙیکھݨ چاہندے۔ انہاں آکھیا جو مسابقتی کمیشن صارفین دے حقوق دے تحفظ دا ذمے دار اے، مسابقتی کمیشن دی ذمہ داری کنزیومر پروٹیکشن سوسائٹی کیتے اہم اے۔ کارپوریٹ قانون اچ بہتری دی گنجائش موجود اے۔ نائب وزیر اعظم آکھیا جو 2013ء اچ پاکستان غیرمستحکم مارکیٹ ڈیکلیئر تھی ڳئیا ہئی اتے ملک کوں عامی سطح تے میکرو اکنامک غیر مستحکم ملک قرار ݙے ݙتا ڳئیا ہئی۔ اوندے بعد معیشت بہتر تھئی۔ انہاں آکھیا جو 27 سال دے بعد اساں ملک اچ شنگھائی تعاون تنظیم (ایس ای او) دے اجلاس دی صورت اچ کثیر الجہتی ایونٹ کیتے۔ نائب وزیراعظم آکھیاجو اڄ وزیراعظم محمد شہباز شریف دی حکومت دا پہلا سال پورا تھی ڳئے۔ وزیراعظم ملک دی ترقی کیتے کوشش کریندے پئن۔
