اسلام آباد۔5مارچ (اے پی پی) وزیراعظم محمد شہباز شریف بنوں چھاؤنی تے ناکام حملے اچ ملوث فتنہ الخوارج دے دہشت گرداں دے خلاف کامیاب آپریشن تے سکیورٹی فورسز کوں خراج تحسین اتے دہشت گرداں دا بہادری نال مقابلہ کریندیں ہوئیں شہید تھیوݨ آلے سکیورٹی فورسز دے پںڄ جواناں کوں خراج عقیدت پیش کیتے۔ بدھ کوں وزیراعظم آفس دے میڈیا ونگ توں جاری بیان موجب وزیراعظم شہیداں دے درجات دی بلندی دی دعا کیتی اتے انہاں دے ٹبراں نال تعزیت کیتی۔ وزیراعظم بنوں چھاؤنی حملہ اچ ملوث فتنہ الخوارج دے سارے 16 دہشت گرداں کوں جہنم واصل کرݨ تے سکیورٹی فورسز دی تعریف کیتی۔ وزیراعظم آکھیا جو سکیورٹی فورسز دے بہادر جواناں آپݨی جان تے کھیݙ تے دہشت گرداں دے مقاصد کوں ناکام ٻݨاݙتے اتے ملک کوں ہک وݙے ضیان توں بچا ڳھدے۔ وزیراعظم آکھیا جو ملک توں ہر قسم دی دہشت گردی دے پورے خاتمے کیتے پرعزم ہیسے۔
