اسلام آباد۔5مارچ(اے پی پی)متحدہ عرب امارت دی انٹرنیشنل فری زونز اتھارٹی پاکستان دے خصوصی اقتصادی زونز اچ سرمایہ کاری کریسی۔ وزیر اعظم محمد شہباز شریف نال انٹرنیشنل فری زونز اتھارٹی متحدہ عرب امارات اتے الیریا گروپ دے 8 رکنی وفد ملاقات کیتی۔ ملاقات اچ چیئرمین انٹرنیشنل فری زونز اتھارٹی مارٹن گریگرز پیڈرسن اتے الیریا دے مینجنگ پارٹنر مانا علی محمد حماد الشمسی سودھا ٻئے عہدیداران شریک ہن۔ ملاقات اچ نائب وزیر اعظم و وزیر خارجہ اسحاق ڈار، وفاقی وزیر منصوبہ بندی احسن اقبال، وفاقی وزیر نجکاری عبد العلیم خان، وفاقی وزیر اطلاعات و نشریات عطاء اللہ تارڑ، معاون خصوصی طارق فاطمی اتے متعلقہ اعلی حکام موجود ہن۔ وزیراعظم آکھیا جو پاکستان اچ کئی شعبیاں اچ سرمایہ کاری دے ودھ امکانات ہین، حکومت ملک اچ کاروبار و سرمایہ کاری دوست ماحول کیتے ترجیحی اقدامات کریندی پئی اے۔ وفد وزیر اعظم دے معاشی اقدامات دی تعریف کریندے آکھیا جو پاکستان خطے اچ سرمایہ کاری کیتے موزوں ترین مارکیٹ ٻݨدا پئے۔ وفد پاکستان اچ سرمایہ کاری دے فٹ پرنٹ ٻئے ودھاوݨ اچ دلچپسی ݙکھائی۔ ملاقات دے بعد سرمایہ کاری بورڈ اتے انٹرنیشنل فری زونز اتھارٹی وچال پاکستان دے موجودہ سپیشل اکنامک زونز اچ سرمایہ کاری بارے مفاہمتی یادداشت دا تبادلہ تھئے جیندے اچ وزیر اعظم شرکت کیتی۔ متحدہ عرب امارات دی انٹرنیشنل فری زون اتھارٹی اتے سرمایہ کاری بورڈ پاکستان وچال پاکستان دے موجودہ سپیشل اکنامک زونز اچ سرمایہ کاری دی مفاہمتی یادداشت دا تبادلہ تھیا۔ متحدہ عرب امارت دی انٹرنیشنل فری زونز اتھارٹی پاکستان دے موجودہ سپیشل اکنامک زونز اچ کئی منصوبیاں اچ سرمایہ کاری کریسی۔
