کراچی۔06 مارچ (اے پی پی) پاکستان دے معروف سرجن اتے ایس آئی یو ٹی کراچی دے شعبہ یورولوجی دے سربراہ ڈاکٹر مرلی دھر طبی تحقیق اتے طبی کانفرنساں اچ مریضاں کوں رلاوݨ دی تجویز ݙیندے آکھیے جو ڄق اچ تھیوݨ آلیاں میڈیکل کانفرنساں اتے تحقیقی کماں اچ مریضاں کوں وی رلایا ویندے، ایں سانڳے پاکستان اچ وی اقدامات ہووݨے چاہیدن۔ اے پی پی نال الیندے ڈاکٹر مرلی دھر دا آکھݨ ہا جو پہلی واری معذوری دے حق اچ الاوݨ آلے رضاکاراں میڈیکل کانفرنساں اچ مریضاں دی شرکت تے ڳالھ کیتی ڄݙاں جو مریض تنظیماں وی مریضاں کوں صحت دے معاملات اچ ودھ توں ودھ شامل کرݨ تے زور ݙتے۔ ڈاکٹر مرلی دھر آکھیے جو پیشنٹ پروٹیکشن اینڈ افورڈ ایبل کیئر ایکٹ دے تحت امریکہ اچ مریضاں کیتے ٻݨائے گئے قانون دے تحت مریضاں کوں تحقیق اچ شامل کیتا ویسی۔ 1992 اچ 8 ویں ایڈز انٹرنیشنل کانفرنس او پہلی کانفرنس ہئی جیندے اچ مریضاں حصہ ڳھدا ہا اتے 2002 توں مریضاں OMERACT اچ باقاعدگی نال حصہ ڳھنݨ شروع کیتے۔ ریمیٹولوجی کانفرنس دے شرکاء اچ 10 فيصد مریض ہن۔ تحقیق اچ مریضاں کوں رلاوݨ نال چنڳے نتیجے نکلین، 2011 اچ سٹینفورڈ یونیورسٹی اچ اسکالرشپ پروگرام دے تحت میڈیسن 2.0 کانفرنس اچ 35 توں ودھ مریضاں شرکت کیتی۔ ڈاکٹر مرلی دھر آکھیا جو سوشل میڈیا دا استعمال ودھدا پئے جیندے نال عوام کوں سوکھیاں معلومات پچایاں ونڄ سڳدن، فیصلہ سازی اچ ہݨ مریض اہم ہین، او تحقیق و طبی سہولیات اچ شامل ہین، ڄݙاں جو پیسہ خرچ کرݨ آلے ایندے اچ ودھ حصہ ڳھندے پن، تہوں عوام اتے مریض وی ایندے اچ دلسچپی ڳھندن۔انہاں آکھیا جو امريکا اچ، مریض تے مبنی تحقیقی ادارے جیویں کینیڈین انسٹی ٹیوٹ آف ہیلتھ اینڈ ریسرچ، نیشنل انسٹی ٹیوٹ آف ہیلتھ اینڈ کیئر ریسرچ اتے ٻئے ادارے مریضاں دے مفادات دے متعلق تحقیق کریندن، لیوس انجلین، مریض دے وکیل جیرھے پیشنٹ چارٹر اتے ورلڈ ہیلتھ آرگنائزیشن نال ڄڳ دے مریضاں اتے عوام کوں رلاوݨ تے الیندن، پیشنٹ ریوولوشن انٹرنیشنل مشترکہ فیصلہ سازی سوسائٹی اتے کیئر لیب صحت دی سہولیات کوں تجارتی دے بجائے منافع کیتے ٻݨاوݨ بارے الیندن۔ برٹش میڈیکل جرنل گروپ دے 60 جریدے مریضاں اتے عوام کوں اپݨے جریدے دی تحریر اچ رلیندن اتے مریض دی ایڈیٹرشپ ݙیندن، انہاں کولو ودھ بین الاقوامی مریض اتے عوامی مشاورتی پینل ہین جیندے نال او صحت دے مسائل دا حل ڳولیندن۔ ڈاکٹر مرلی دھر آکھیا جو 2023 اچ برٹش میڈیکل جرنل 40 فیصد مریضاں دا تعلیمی مواد شائع کیتے یا او ایندے اچ شامل ہن، ساݙے ملک اچ ادھ لوڑھ اے جو ایں عمل اچ مریض کوں رلا تے مریضاں کوں فیدہ ݙتا ونڄے، ڄڳ اچ ڈاکٹراں دے خلاف عدالتاں اچ کیسز ہین، ساݙے کولو لوک ہیلتھ کیئر کمیشن کوں وی شکایات کریندن ٻھل جیکر مریض اتے انہاں دے لواحقین مشاورت اچ نال ہوون تاں حالات بہترتھیسن اتے چنڳے نتائج نکلسن۔ انہاں اکھیا جو سرکاری اتے پرائیویٹ ہسپتالاں اچ مریضاں دے بہتر طریقے نال علاج کوں ودھ اہمیت نئیں ݙتی ویندی بھل ہݨ ڄق اچ طبی فیصلاں اتے تحقیق اچ مریضاں اتے انہاں دے لواحقین کوں رلایا ویندا پئے، ساکون ایں بارے وی سوچݨا ہوسی، ساݙے طبی جرائد اچ مریضاں دی تحریراں وی شامل ہووݨیاں چاہیدن، انہاں کوں میڈیکل کانفرنساں اچ سݙیا ونڄے، اے سب کڄھ مفت ہووݨا چاہیدے اتے ایندے نال معاشرے دی صحت بہتر تھیسی۔
