راولپنڈی۔6 مارچ(اے پی پی)پاک فوج دے سربراہ جنرل سید عاصم منیر عوام دی حفاظت دا عزم دوہریندے آکھیے جو پاک فوج دہشت گردی دے خلاف سیسہ پلائی دیوار اے۔ آئی ایس پی آر دے مطابق آرمی چیف جنرل سید عاصم منیر بنوں چھائونی اچ خوارج دا حملہ ناکام ٻݨاوݨ دے بعد بنوں دا دورہ کیتے جتھاں آرمی چیف کوں جاری آپریشنز، علاقے دی سکیورٹی صورتحال تے بریفنگ ݙتی گئی۔ آرمی چیف سی ایم ایچ بنوں اچ زخمی اہلکاراں دا حال پچھیا اتے اہلکاروں دی بہادری اتے حوصلے دی تعریف کیتی۔ انہاں آکھیا جو پاک فوج دہشت گردی دے خلاف جنگ وݙے عزم نال جاری رکھسی، عوام دی حفاظت اچ کوئی کسر نا چھوڑی ویسی، شہریاں بشمول ٻالاں، تریمتیں اتے بزرگاں کوں بہیمانہ طور تے نشانہ ٻݨاوݨ خوارج دے اصل عزائم ظاہر کریندے، دہشت گردی دے خلاف جنگ اچ قومی یکجہتی ضروری اے۔ آرمی چیف بزدلانہ دہشت گرد حملے اچ شہید شہریاں دے خانداناں نال افسوس کیتے اتے آکھیے جو واقعے اچ ملوث ملزمان کوں فوری طور تے جواناں کیفر کردار تئیں پچایا ہا، حملے دے منصوبہ سازاں اتے معاونین کوں وی تیکھے انصاف دے کٹہرے اچ ڳھن آیا ویسی۔
