اسلام آباد۔6مارچ(اے پی پی)وزیراعظم محمد شہباز شریف سمیڈا اچ نویں ہنرمند افرادی قوت بھرتی کرݨ اتے دیہی آبادی کوں بلاسود قرض پروگرام توں فیدہ ݙیوݨ کیتے لائحہ عمل ٻݨاوݨ دی ہدایت کریندے آکھیے جو چھوٹے اتے درمیانے درجے دے کاروبار دےو دھارے سانڳٖ حکومت ترجیحی اقدامات کریندی پئی اے۔ او اسلام اباد اچ سمال اینڈ میڈیم انٹرپرائز ڈویلپمنٹ اتھارٹی (سمیڈا) دی سٹیئرنگ کمیٹی دے اجلاس دی اڳواݨی کریندے پئے ہن۔ اجلاس نال الیندے انہاں آکھیا جو چھوٹے اتے درمیانے درجے دے کاروبار دے ودھارے سانڳٖ حکومت ترجیحی اقدامات کریندی پئی اے، شفاف طریقہ کار نال سمیڈا اچ بین الاقوامی معیار دی ورک فورس بھرتی کیتا ونڄے جیندی تنخواہ مارکیٹ ریٹس دے مطابق ہووے، ایس ایم ای شعبے کیتے لیبر دی پیشہ وارانہ تربیت ضروری اے، دیہی آبادی بشمول دیہی خواتین کوں سمیڈا دے بلاسود قرض پروگرام توں فیدہ ݙیوݨ کیتے لائحہ عمل ٻݨایا ونڄے۔ وزیراعظم وفاقی سطح تے پیشہ وارانہ تربیت دے اداریاں کوں ہک ادارے اچ ضم کرݨ دی وی ہدایت کیتی۔ اجلاس کوں سمیڈا اچ جاری اصلاحات تے بریفنگ وی ݙتی گئی۔ اجلاس اچ وفاقی وزیر اقتصادی امور احد خان چیمہ، وفاقی وزیر صنعت و پیداوار رانا تنویر حسین، وزیراعظم دے معاون خصوصی ہارون اختر، چیئرمین پی ایم یوتھ پروگرام رانا مشہود احمد خان اتے متعلقہ اعلیٰ سرکاری افسران شرکت کیتی ڄݙاں جو ارکان قومی اسمبلی سیدہ نوشین افتخار اتے محسن شاہنواز رانجھا بذریعہ وڈیو لنک اجلاس اچ شریک تھئین۔
