اقوام متحدہ۔7مارچ (اے پی پی) پاکستان یمن اچ سیاسی مذاکرات دی بحالی دی لوڑھ تے زور ݙیندے آکھیے خطے اچ امن و استحکام سانڳے یمن کوں پیش آندے کثیر جہتی بحران نال نبݨݨ سانڳے فیصلہ کن اقدامات کرݨ دی لوڑھ اے ۔ اقوام متحدہ اچ پاکستان دے مستقل مندوب منیر اکرم گزریل ݙینھ اقوام متحدہ دی سلامتی کونسل اچ یمن دی صورت حال تے بحث اچ آکھیے عالمی برادری کوں بحران دے مزید وڳاڑ کوں روکݨ تے یمن سانڳے استحکام تےامید دے مستقبل دا رستہ ہموار کرݨ سانڳے وختی کم کرݨا چاہیدے۔ انہاں آکھیے اساں اقوام متحدہ دی قیادت اچ امن عمل کیتے اپݨی مکمل حمایت دا اعادہ کریندوں تے تنازع دے ھک جامع اتے تکڑے حل دی لوڑھ تے زور ݙیندوں۔پاکستانی مندوب مزید آکھیے ایں سلسلے اچ علاقائی اقدامات، خاص طور تے سعودی عرب تے عمان دی قیادت اچ ، انھاں مذاکرات کوں اڳوں ودھاوݨ اچ اہم ہن۔ انہاں یمن اچ انسانی صورتحال کوں افسوسناک قرار ݙیندے آکھیے جݙاں اساں رمضان المبارک دا مقدس مہینہ منیندے پیوں ، یمن اچ لکھاں لوک اوکھ دا شکار ہن ، ایں ویلھے 19.5 ملین لوکاں کوں وختی انسانی امداد دی لوڑھ اے، بشمول 17.1 ملین لوک شدید غذائی عدم تحفظ دا سامݨا کریندے پئن ۔ 4.5 ملین لوک اندرلے طور تے بے گھر ہن تے 12 ملین ٻال خوراک، پاݨی، رہائش اتے صحت دی ݙیکھ بھال جیھی بنیادی ضرورتاں تئیں رسائی توں محروم ہن ۔ پاکستانی ایلچی ایں صورتحال اچ یمن اچ انسانی بنیاداں تے آپریشن سانڳے فنڈز دی کٹوتی تے افسوس کیتے تے بین الاقوامی برادری اتے ڈونر ملکاں توں ایں خلا کوں پُر کرݨ تے زور ݙتےتے امید ظاہر کیتی جو او یمن سانڳے اڄوکے سال دے انسانی ہمدردی دی بنیاد تے امدادی ردعمل دے منصوبے اچ آپݨا تعاون ودھیسن ۔ انہاں آکھیے پاکستان تجارتی جہازاں تے حوثیاں دے حملیں دی مذمت کیتی ، لیکن اقوام متحدہ دی ھک رپورٹ اچ آکھیا ڳئے جو گزریل مہینے جہاز رانی تے حملیں دا کوئی واقعہ ریکارڈ کائنی تھیا ، غزہ اچ مستقل جنگ بندی نہ صرف اسرائیل نال فلسطین اچ امن دا سبب بݨسی بلکہ یمن سودھے علاقائی استحکام اچ وی معاون ثابت تھیسی۔
