اسلام آباد۔9مارچ(اے پی پی) وفاقی وزیرخزانہ دے مشیرخرم شہزاد آکھیے ملکی معیشت کوں دیوالیہ تھیوݨ دے دھانے توں کڈھ تے سدھے پاسے ٹور ݙتا ڳئے ۔ پاکستان اچ اٹھ مہینے دی اوسط مہانگ دی شرح 6 فیصد دے نیڑے ہے، پنشن اصلاحات اتےرائٹ سائزنگ کیتے اقدامات تھیندے پئن ، ٹیکس دے نظام کوں منصفانہ بݨایا ویندا پئے ۔ اے پی پی کوں خصوصی انٹرویو ݙیندے انہاں آکھیے گزریل ھک سال اچ ملکی معیشت کوں دیوالیہ تھیوݨ دے دھانے توں کڈھ تے سدھے پاسے ٹور ݙتے۔ مسئلے تے اوکھ توں نکل تے تکڑے استحکام تے نمودے رستے تے ٹرچکیوں ۔ انہاں آکھیے مہانگ اچ نمایاں کمی آچکی اے، ھک ویلھے اچ صارفین سانڳے عمومی مہانگ دی شرح تاریخ دی اتکء سطح تے پڄ ڳئی ہئی ، کھاوݨ پیوݨ دیاں چیزاں 49 فیصد تئیں ودھ ڳیاں ہن ، حکومتی اقدامات پاروں مہانگ دی شرح ݙڈھ فیصددی سطح تے آچکی اے،ہے ھک وݙی کامیابی اے تے ایں توں عوام کوں ریلیف ملیے۔ انہاں آکھیے ترکیہ، ارجنٹائن، مصراتے نائیجریا اچ ھک سال پہلے اوسط مہانگ دی سطح 35 توں 36فیصدتئیں جݙاں جو پاکستان اچ 38فیصد ہئی ایں ویلھے پاکستان اچ اٹھ مہینے دی اوسط مہانگ دی شرح 6 فیصد دے نیڑے ہے جݙاں جو مندرجہ بالاملکاں اچ اوسط مہانگ دی شرح ایں ویلھے وی 35فیصد توں ودھ اے ، حکومتی اقدامات دے نال بین الاقوامی مارکیٹ اچ کھاوݨ پیوݨ دیاں چیزاں اچ کمی تے روپیہ دی قدر اچ استحکام توں وی مہانگ دے دٻاؤ کوں گھٹ کرݨ اچ مدد ملی اے ۔مشیرخزانہ آکھیے ماضی اچ مہانگ اچ ودھارے توں شرح سود اچ وی ودھارا تھی ڳیا ہئی جئیں توں صنعتاں اتے کاروبارکو اوکھ دا سامݨا ہئی شرح سود ایں ویلھے 12 فیصد اے تے ایں توں صنعتاں کوں سرمایہ کاری کرݨ تے نویں قرضے گھنݨ اچ سوکھ تھئی اے
