لاہور۔9مارچ(اے پی پی) وفاقی وزیر پبلک افیئر یونٹ رانا مبشر اقبال آکھیے جو عوام دے مسئلیں دا حل تے خوشحالی حکومت دی اولین ترجیح اے، وزیراعظم محمد شہباز شریف او کرݙکھائے جیڑھا جو ناممکن سمجھیا ویندا پیا ہئی ،موجودہ حکومت جب اقتدار سنبھالیے تاں ملک دیوالیہ تھیوݨ دے دہانے تے ہئی لیکن انتھک محنت اتے صحیح فیصلیں دے نتیجے اچ پاکستان کوں ھک واری ول ترقی دے رستے ٹور ݙتا ڳئے ۔ اے ڳالھ انہاں خیابان امین اچ پریس کانفرنس توں خطاب اچ آکھی ۔رانا مبشر اقبال آکھیے ماضی اچ پاکستان دا کوئی دوست ملک نہ بچیا ہئی ، مگر ہݨ خارجہ پالیسی کوں چنڳاں کرتے عالمی سطح تے پاکستان دی ساکھ بحال کرݙتی ڳئی اے ۔ انھاں دعوی کیتے جو جیویں نو مئی دے واقعات اچ ملک کوں ضیان پڄایا ڳیا ، او کہیں دشمن وی نی کیتا ، پی ٹی آئی جی ایچ کیو تے حملے کروائے ، چھاوݨیاں اچ جلائو گھیرائو کیتا جیڑھا تاریخ دا سیاہ باب اے، موجودہ حکومت معیشت کوں سنبھالیے ، مہانگ 38 فیصد توں گھٹ تھی تے 1.6 فیصد تئیں آڳئی اے ، پاکستان دی اڑان وختی پورے ایشیاء اچ نظر آسی ۔ رانا مبشر اقبال مزید آکھیے موجودہ حکومت ملک کوں اندھاریں توں کڈھ تے اجالیں اچ گھن آئی تے معیشت کوں چنڳاں کیتا ویندا پئے ۔ انہاں آکھیے موجودہ حکومت تے کرپشن دا کوئی اسکینڈل سامݨے کائنی آیا ۔ انہاں آکھیے رمضان پیکج دے تحت 40 لکھ خانداناں کوں براہ راست امداد پڄائی ویندی پئی اے جݙاں جو پہلے لوک یوٹیلٹی اسٹورز تے دھکے کھمدے ہن۔ ھک سوال تے وفاقی وزیرآکھیے خیبر پختونخوا کوں دیوالیہ کرݙتا ڳئے ، علی امین گنڈا پور صرف ٻڑکاں مریندا پئے ، عوام دے مسئلے مکاوݨ انہاں دے وس دی ڳالھ کائنی ، مریم نواز دے ترقیاتی منصوبے علی امین دے دعویں تے بارے ہن
