لاہور۔9مارچ(اے پی پی) وزیراعظم محمد شہباز شریف آکھیے حکومت نینگران کوں جدید مہارتاں نال لیس کرݨ سانڳے ہر ممکن تعاون کریندی پئی اے ،ہواوے دے آئی سی ٹی ٹریننگ پروگرام توں آئی ٹی برآمدات اچ ودھارے سودھے نینگراں کوں روزگار گھنݨ اچ مدد ملسی ۔ اے ڳالھ انہاں آپݨی صدارت اچ ہواوے ٹیکنالوجیز نال پاکستان دے ترائے لکھ نینگراں کوں آئی سی ٹی ٹریننگ ݙیوݨ دے حوالے نال جائزہ اجلاس اچ آکھی ۔وزیراعظم دفتر میڈیا ونگ توں جاری بیان موجب اجلاس اچ ہواوے ٹیکنالوجیز دے وفد دے ارکان شرکت کیتی۔اجلاس اچ نینگراں کوں ڈیجیٹل مہارتاں نال آراستہ کرݨ تے آئی ٹی دے شعبے اچ عالمی معیار دی تربیت ݙیوݨ سانڳے مختلف اقدامات تے ڳالھ مہاڑ کیتی ۔ اجلاس اچ گزریل سال چین اچ ہواوے ٹیکنالوجیز نال طے کیتے ڳئے معاہدیں تے عمل درآمد دا جائزہ ڳھدا ڳئے۔ ایں موقع تے وزیراعظم آکھیے ٹیکنالوجی دے ودھارے تے ڈیجیٹل انقلاب اچ نینگراں دا کلیدی کردار اے ،حکومت نینگراں کوں جدید مہارتاں نال لیس کرݨ سانڳٖ ہرممکن تعاون کریندی پئی اے ،ہواوے دے آئی سی ٹی ٹریننگ پروگرام توں آئی ٹی برآمدات اچ ودھارے سودھے نینگراں کوں روزگار گھنݨ اچ مدد ملسی ۔ہواوے ٹیکنالوجیز دے نمائندیں پاکستان اچ جدید تربیتی پروگرام سانڳٖے آپݨے عزم دا اظہار کیتے ۔ ہواوے ٹیکنالوجیز ایں اقدام دے تحت نینگراں کوں مصنوعی ذہانت (اے آئی)، سائبر سیکورٹی، کلائوڈ کمپیوٹنگ اتے ٻئی جدید ٹیکنالوجیز اچ تربیت ݙیسی ۔وزیراعظم کوں ݙسایا ڳئے 3 لکھ پاکستانی نینگراں کوں آن لائن تربیت ݙتی ویسی ۔ ایں مقصد سانڳے آئی سی ٹی ٹریننگ پورٹل دا باقاعدہ افتتاح وزیراعظم محمد شہباز شریف کریسن ۔ہواوے ٹیکنالوجیز دی طرفوں ایں ویلھے تئیں 20 ہزار 315 طالبیں کوں تربیت ݙتی ڳئی اے۔پروگرام دے تحت سٹوڈنٹس، ٹرینرز اتے آئی سی ٹی ٹیکنالوجیز اچ کم کرݨ آلیں دی اپ سکلنگ کیتی ویندی پئی اے ۔ وزیراعظم آئی ٹی ٹریننگ منصوبیں تے تکھے عمل درآمد یقینی بݨاوݨ دی ہدایت کیتی ۔ وزیراعظم آئی سی ٹی ٹریننگ پورٹل ودھ توں ودھ لوکاں تئیں پڄاوݨ دی وی ہدایت کیتی ۔ اجلاس اچ وفاقی وزیر اطلاعات و نشریات عطاء اللہ تارڑ ، وفاقی وزیر انفارمیشن ٹیکنالوجی و ٹیلی کام شزا فاطمہ ، وزیراعظم دے معاون خصوصی ہارون اختر ، چیئرمین پی ایم یوتھ پروگرام رانا مشہود احمد خان اتے متعلقہ اعلیٰ سرکاری افسراں شرکت کیتی۔
