اسلام آباد۔10مارچ (اے پی پی) وزیراعظم محمد شہبا زشریف رمضان پیکج 2025 دی مانیٹرنگ دے نظام دی تعریف کریندیں ہوئیں آکھیا جو رمضان پیکج مانیٹرنگ پروگرام دے ذریعے 40 لکھ مستحق ٹبراں اچ 20 ارب روپے شفاف انداز اچ ونڈیے ویسن، ڈیجیٹل والٹ پروگرام قابل تعریف اے۔ وزیراعظم سنوار کوں رمضان پیکج 2025 دے مانیٹرنگ دے نظام دا جائزہ ڳھنݨ کیتے نیشنل ٹیلی کمیونیکیشن کارپوریشن ہیڈ کوارٹرز دا دورہ کیتا۔ ایں پروگرام نال چاریں صوبے، آزاد کشمیر اتے گلگت بلتستان اچ 40 لکھ ٹٻراں اچ فی ٹبر پںج ہزار روپے دے حساب نال 20 ارب روپے تقسیم کیتے ویسن۔ بریفنگ اچ وزیراعظم کوں ݙسیا ڳئیا جو مانیٹرنگ سینٹر اچ ملݨ آلی کالز دا پورا ڈیٹا موجود اے اتے ہر ݙینھ ہزاراں دی تعداد اچ عوام کوں معلوم کیتے سینٹرز کم کریندے پئن۔ ساری کالز کوں ضروری کاروائی دے بعد نبیڑیا ویندے۔ وزیراعظم کوں ݙسیا ڳئیا جو 14 ارب روپے دی رقم مستحق عوام تئیں پڄ ڳئی اے اتے ہک ہک مستحق دا پورا ڈیٹاموجود اے۔ وزیراعظم ڈیجیٹل والٹ پروگرام دی تعریف کریندیں ہوئیں پروگرام دے کامیاب اجرا تے وزارت آئی ٹی اتے متعلقہ وزارتاں اتے حکام کوں مبارخ ݙتی۔ وزیراعظم آکھیا جو پہلی واری 20 ارب روپے دا رمضان پیکج بذریعہ ڈیجیٹل والٹ حقداراں کوں ݙتا ویندا پئے۔ انہاں آکھیا جو عوام دی فلاح و بہبود اساݙی پہلی ترجیح اے۔ اے جامع اتے شاندار پروگرام قابل تعریف اے۔ وزیراعظم آکھیا جو ایں نیک کم اچ تعاون کرݨ آلے بینکاں، کمپنیاں اتے حکام دا شکریہ ادا کیتے۔ وزیراعظم 9999 تے کال کر تے پروگرام بارے معلومات ڳھدی۔ انہاں 9999 تے ملݨ آلی شکایتاں بارے پچھیا۔ وزیراعظم آئی ٹی ، انڈسٹریز ، سٹیٹ بینک سودھے معتلقہ حکام کوں پروگرام بارے ضروری ہدایات ݙتی۔ دورے اچ وفاقی وزیر اطلاعات تے نشریات عطااللہ تارڑ، وفاقی وزیر برائے انفارمیشن ٹیکنالوجی شزہ فاطمہ، معاون خصوصی برائے صنعت وپیداوار ہارون اختر اتے متعلقہ حکام موجود ہن۔
