اسلام آباد۔10مارچ(اے پی پی)صدر مملکت آصف علی زرداری پارلیمان تے زور ݙتے جو اتحاد و یکجہتی نال عوام کوں بااختیار ٻݨیدے ہوئے قومی اہمیت دے فیصلے کرے، سرمایہ کاری اتے سماجی و اقتصادی انصاف ودھایا ونڄے، جمہوریت دا تقاضا باہمی تعاون و مفاہمت اے جیندے کیتے پارلیمنٹ توں بہتر کوئی ڄاہ کائنی، حکومت آندے بجٹ اچ تنخواہیں اتے پنشن ودھاوے، انتہا پسندانہ نظریات اتے عسکریت پسندی نال نمٹݨ کیتے اتفاق رائے سانڳے پارلیمنٹ کردار ادا کرے۔ او 16 ویں پارلیمان دے ݙوڄھے پارلیمانی سال دے شروع اچ پارلیمنٹ دے مشترکہ اجلاس نال خطاب کریندے پئے ہن۔ انہاں آکھیا جو ایوان بہتر طرز حکمرانی، سیاسی اتے اقتصادی استحکام تے توجہ ݙیوے، عوام دیاں امیداں پارلیمنٹ نال جڑیاں ہوئن، ساکوں عوام دی توقعات تے پورا ہووݨا چاہیدے، جمہوری نظام مضبوط کرݨ، قانون دی حکمرانی تے عوام دا اعتماد بحال کرݨ کیتے وڈی محنت کرݨی ہوسی۔ انہاں ملک کوں معاشی ترقی دے مثبت رستے تے سٹݨ کیتے حکومتی کوششاں دی تعریف کیتی۔ صدر مملکت آصف علی زرداری آکھیے جو انتہا پسندانہ نظریات، تشدد دی حمایت کرݨ آلی عسکریت پسندی نال نمٹݨ کیتے اتفاق رائے سانڳے پارلیمنٹ کوں کردار ادا کرݨا چاہیدے۔ انہاں آکھیا جو اڄوکے اندرونی و بیرونی سکیورٹی چیلنجز سانڳے سکیورٹی صلاحیتاں کوں ٻیا تکڑا کرݨ، دہشت گردی نال موثر انداز اچ نمٹݨ کیتے قانون نافذ کرݨ آلے اداریاں دی استعداد ودھاوݨ دی لوڑھ اے، اڄ دہشت گرداں کوں ڄیڑھی بیرونی سپورٹ اتے فنڈنگ ملدی پئی اے جیندے نال اساں سارے واقف ہیں، دہشت گردی دے خلاف جنگ اچ ساݙیاں سکیورٹی فورسز اپݨیاں جاناں ݙتن، اساں ولا دہشت گردی کوںس ر چاوݨ دی اجازت نئیں ݙے سڳدے۔ صدر مملکت آکھیا جو اپݨی قوم اتے بہادر مسلح افواج دے تعاون نال دہشت گردی دی لعنت کوں ختم کرݨ کیتے پرعزم ہیں، انٹیلی جنس بیسڈ کامیاب کارروائیاں نال دہشت گرد نیٹ ورکس مکائے ڳن، ساکوں نئیں ٻھلݨا چاہیدا جو عسکریت پسندی دیاں پاڑاں محرومی اتے عدم مساوات اچ پاتیاں ویندن، تہوں دہشت گردی نال سب توں ودھ متاثر تھیوݨ آلے خطیاں دی ترقی تے توجہ ݙیندے روزگار پیدا کرݨا چاہیدے۔صدر مملکت آکھیا جو اجتماعی اہداف تے کم کرݨ کیتے پارلیمنٹ توں بہتر کوئی ٻیا فورم نئیں تھی سڳدا، منتخب نمائنداں دے طور تے ارکان پارلیمنٹ قوم کیتے رول ماڈل ہوندن، پارلیمانی کم بارے مخصوص اہداف توں ہٹ تے سوچݨا چاہیدے، اراکین پارلیمنٹ اتحاد اتے اتفاق دا سوچن جیندی ودھ لوڑھ اے، اپݨے لوکاں کوں بااختیار ٻݨائو اتے اتفاق رائے نال قومی اہمیت دے فیصلے کرو۔ صدر مملکت آصف علی زرداری آکھیے جو پاکستان علاقائی امن، استحکام و اقتصادی انضمام کیتے پرعزم اے، ساݙی خارجہ پالیسی ہمیشہ قومی مفادات، بین الاقوامی تعاون، خودمختاری و باہمی احترام دے اصولاں تے مبنی رہسی۔ ساکوں دوست علاقائی ممالک نال تجارت، معیشت، ماحول اتے ثقافت دے تبادلے دے شعبیاں اچ تعاون ودھاوݨا چاہیدے، اساں ہک ذمہ دار اتے امن پسند قوم دی حیثیت نال اپݨا کردار ادا کریندے رہسوں، چین نال ساݙے تعلقات ساݙی سفارت کاری دا سنگ بنیاد ہین، بیجنگ نال اقتصادی و تزویراتی تعلقات ٻئے مستحکم کریندے ہوئے آل ویدر سٹریٹجک کوآپریٹو پارٹنرشپ ودھیسوں اتے ون چائنا پالیسی دی حمایت جاری رکھسوں۔ قابل اعتماد دوستاں، سعودی عرب، متحدہ عرب امارات، ترکی اتے ٻئے دے تعاون دے معترف ہیں جیڑھے ساݙے نال کھڑے رہین، اساں خلیج و وسطی ایشیا دے دوست ممالک دے نال نال یورپی یونین، برطانیہ اتے ریاستہائے متحدہ امریکہ نال اپݨے دیرینہ تاریخی، ثقافتی و اقتصادی تعلقات ٻئے تکڑے کرݨ چاہندے ہیں، پاکستان اتے امریکا کوں انسداد دہشت گردی تعاون اتے مشترکہ مقاصدکیتے تعلقات دی تجدید کرݨی چاہیدی اے۔ صدر مملکت آصف علی زرداری آکھیے جو کشمیری عوام کئی ݙھاکیاں توں متواتر بھارتی حکومتاں دے ناجائز قبضے، جبر اتے انسانی حقوق دی وحشیانہ خلاف ورزیاں دا شکار ہین، پاکستان کشمیری عوام دے حق خودارادیت دی جدوجہد اچ انہاں دے نال کھڑا رہسی۔ پارلیمنٹ دے مشترکہ اجلاس نال خطاب اچ انہاں آکھیا جو اساں کشمیری عوام کیتے اپݨی غیر متزلزل اخلاقی، سیاسی و سفارتی حمایت دا عزم کریندے ہیں جو عالمی برادری بھارتی قابض افواج دے مظالم دے خلاف فیصلہ کن کارروائی کرے، مظلوماں دی آواز کوں چپ نئیں کیتا ونڄ سڳدا اتے پاکستان اے مسئلہ ہر عالمی فورم تے چیندا رہسی۔ صدر مملکت آکھیے جو ایوان کوں اپݨیاں ذمہ داریاں سنجیدگی نال نٻھاوݨیاں ہوسن، ایوان گورننس، خدمات دی فراہمی دے نتائج کوں ازسرِ نو ترتیب ݙیوݨ اچ اپݨا کردار ادا کرے، وزارتاں وی اپݨا ویژن اتے مقاصد نویں سروں متعین کرن، یقین اے جو ہک مضبوط پاکستان او ہے جتھاں ترقی دے ثمرات سارے صوبیاں اتے شہریاں کوں برابری دی سطح تے پڄین، ہمہ گیر و یکساں ترقی ودھاوݨ کیتے فعال تھیوݨا ہوسی تاں جو کوئی صوبہ، کوئی ضلع اتے وستی پچھو نا رہ ونڄے، علاقیاں دا احساس محرومی دور کرݨ کیتے انفراسٹرکچر، تعلیم، صحت اتے معاشی مواقع اچ سرمایہ کاری دی لوڑھ اے۔ نینگراں اتے مختلف شعبیاں اچ خواتین دی نمائندگی ودھاوݨی ہوسی اتے انہاں کوں نویں امید ݙیوݨی ہوسی جو او ملک دی ترقی اچ ہتھ ونݙاون۔ انہاں فلسطین اچ سلسلہ وار تباہی دو ڄڳ دی توجہ ݙویندے آکھیے جو پاکستان فلسطینی کاز کیتے پرعزم اے، ساݙا ہکو موقف اے جو ہک آزاد، خودمختار فلسطینی ریاست دا قیام جیندا دارالحکومت القدس الشریف ہووے جیندے نال خطے اچ دیرپا امن اچ مدد ملسی۔ انہاں آکھیا جو میݙے کیتے پاکستان ہمیشہ پہلے آندے، بخثیت صدر میݙا آئینی فرض اے جو میں ایوان اتے حکومت کوں خبردار کراں جو تہاݙیاں کڄھ یکطرفہ پالیسیاں وفاق تے شدید دبائو سٹینداں پن، وفاقی اکائیاں دی شدید مخالفت دے باوجود حکومت دا دریائے سندھ دے نظام نال ٻیاں نہراں کݙھݨ دی یکطرفہ تجویز دی بطور صدر حمایت نئیں کریندا، حکومت اے تجویز چھوڑ ݙیوے اتے سارے فریقاں دی صلاح نال کم کرے، ساکوں ذاتی دی بجائے قومی مفاد کوں اڳونہا کرݨا ہوسی۔
