قاہرہ ۔12مارچ(اے پی پی) مصر دی وزارت اعلیٰ تعلیم تے سائنسی تحقیق نال وابستہ نیشنل انسٹی ٹیوٹ فار ایسٹرانومیکل اینڈ جیو فزیکل ریسرچ 30 توں زیادہ ملکاں اچ 30مارچ کوں عید الفطرہووݨ دی پیش گوئی کرݙتی اے ۔ العربیہ اردو موجب انسٹی ٹیوٹ اپݨے بیان اچ آکھیے ماہ شوال دا چندر ہفتے کوں29 رمضان 1446 ہجری اتے 29 مارچ 2025 دی مناسبت نال قاہرہ دے مقامی ویلھے موجب ݙوپہر ھک وڄے دے وختی بعد پیدا تھیسی ۔ ایں ݙینھ قاہرہ اچ اے چندر غروب آفتاب دے بعد 11 منٹ تئیں رہسی۔ مصردے باقی گورنریٹس اچ نواں چندر 9 توں 12 منٹ تئیں آسمان تے رہسی ۔انسٹی ٹیوٹ تصدیق کیتی جو عرب اتے اسلامی دارالحکومتاں اتے شہراں سانڳے ایں ݙینھ غروب آفتاب دے بعد نواں چندر 3 توں 19 منٹ دے درمیان موجود رہسی ۔ واضح رہے جو ملائیشیا اچ ایں ݙینھ چندر غروب آفتاب توں 5 منٹ پہلے تے انڈونیشیا اچ غروب آفتاب توں 7 منٹ پہلے ہی غروب تھی ویسی ۔انسٹی ٹیوٹ مصری شہراں دے ناں شائع کیتے جنہاں اچ تلاش دے ݙینھ چندر دے مرحلے ݙیکھئے ونڄ سڳدن ۔ انہاں اچ قاہرہ، حلایب، سکندریہ، سوھاج اتے مصر دے باقی گورنریٹس شامل ہن۔ ادارے انہاں عرب اتے غیر عرب دارالحکومتاں دے ناں وی ݙسائے جنہاں اچ شوال دا چندر 29 مارچ کوں ݙٹھا ونڄ سڳدے۔ انہاں شہراں اچ واكشوط، مراكش، فاس، لاغوس، الجزائر، تونس، طرابلس، ليبيا، خرطوم، مقدشيو، أنقرة، عمان، دمشق، جيزان، مدینہ منورہ ، مکہ مکرمہ ، قدس شريف، بغداد، عدن، رياض، كويت سٹی، كيپ ٹاون، منامہ، تہران، دوحہ، ابوظہبی، دبئی، مسقط، کراچی، کوالا لمپور، جکارتا، برازیلیا، لیما، واشنگٹن، اوٹاوا، لندن اتے ماسکو شامل ہن۔ ایویں ادارے وضاحت کیتی جو 30 مارچ 2025 کوں مذکورہ علاقیں اچ عیدالفطر تھی سڳدی اے۔
