اسلام آباد۔13مارچ(اے پی پی) پاکستان بھارتی حکومت دی طرفوں آپݨے غیر قانونی طور تے زیر تسلط جموں و کشمیر اچ ممتاز سیاسی تے مذہبی رہنما میر واعظ عمر فاروق دی قیادت اچ عوامی ایکشن کمیٹی اتے جموں و کشمیر اتحاد المسلمین کوں پنج سال سانڳے غیر قانونی قرارݙیوݨ دے فیصلے دی شدید مذمت کیتی اے ۔ دفتر خارجہ دے ترجمان شفقت علی خان ہفتہ وار پریس بریفنگ اچ آکھیے عوامی ایکشن کمیٹی دی قیادت میر واعظ عمر فاروق کریندے پئن جݙاں جو جموں و کشمیر اتحاد المسلمین دی بنیاد ھک ٻئے قابل ذکر سیاسی اتے مذہبی رہنما مولانا محمد عباس انصاری مرحوم رکھی ہئی جنہاں 2022 اچ آپݨی وفات تئیں ایندی سربراہی کیتی ۔ انہاں آکھیے بھارتی حکام دے اڄوکے فیصلے توں کالعدم کشمیری سیاسی جماعتاں اتے تنظیماں دی مجموعی تعداد 16 تھی ڳئی اے ۔ ترجمان آکھیے مختلف سیاسی جماعتاں اتے تنظیماں تے پابندی لاوݨ بھارت دے غیر قانونی طور تے قبضے وچ جموں و کشمیر اچ بھارتی حکام دے انتہائی سخت رویے دا ٻیا مظہر اے ۔ انہاں آکھیے اے اقدام سیاسی سرگرمیاں اتے اختلاف رائے کوں دٻاوݨ دی خواہش کوں ظاہر کریندے ۔ دفتر خارجہ دے ترجمان آکھیے اے جمہوری اصولاں تے بین الاقوامی انسانی حقوق دے قانون دی سراسر بے توجہی کوں وی ظاہر کریندے۔ انہاں بھارتی حکومت توں اپیل کیتی جو او کشمیری سیاسی جماعتاں تے پابندیاں ہٹاوے، سارے سیاسی قیدیاں کوں چھوڑے تے جموں و کشمیر بارے اقوام متحدہ دی سلامتی کونسل دی قرارداداں تے عمل درآمد کرے۔
