اسلام آباد۔13مارچ (اے پی پی) قومی اسمبلی جعفرایکسپریس تےدہشت گردی دے حملہ دی مذمت، دہشت گردی دی کو شش کوں ناکام ٻݨاوݨ اچ آپݨی جاناں دی قربانی ݙیوݨ آلے سکیورٹی فورسز اتے شہریاں کوں خراج تحسین اتے یکجہتی دی قرارداد اتفاق رائے نال منظور کر ڳھدی اے۔ خمیس کوں قومی اسمبلی دے اجلاس اچ وفاقی وزیرپارلیمانی امورڈاکٹرطارق فضل چوہدری ایں بارے قرارداد پیش کرݨ دی موکل منڳی، موکل ملݨ تے انہاں قرارداد پیش کیتی جئیں دی ایوان اتفاق رائے نال منظوری ݙے ݙتی۔ قرارداد دے متن اچ آکھیا جو ایوان جعفر ایکسپریس دے ہائی جیکنگ اتے دہشت گردی دی مذمت کریندے۔ ایوان عزم کریندے جو دہشت گردی کوں ملک دی ہر کُنڈ توں مکاوݨ کیتے ہر قدم چاتا ویسی۔ ایوان عزم کریندے جو ملک دے کہیں وی حصے اچ دہشت گردی دی سرگرمری کوں نظر انداز ناں کیتا ویسی۔ اے ایوان سانحہ اچ آپݨی جاناں دا نذرانہ ݙیوݨ آلے بہادر مرداں اتے تریمتیں کوں خراج عقیدت پیش کریندے۔ ایوان پاکستان دی فوج، فضائیہ، ایف سی، ایس ایس جی اتے ٻئے قانون نافذ کرݨ آلے اداریاں دی لگن، بہادری اتے قربانیاں دا شکریہ ادا کریندے۔
