اسلام آباد۔13مارچ (اے پی پی) وزیردفاع خواجہ محمدآصف آکھیا جو جعفرایکسپریس واقعہ اچ مسلح افواج دی کارروائی قابل تحسین اتےدہشت گردی دے خلاف جنگ اچ سنگ میل اے، تحریک انصاف دے لوک اقتدار دی جنگ کر سڳدن پر پاکستان دی سلامتی اتے بقا دی جنگ نی کر سڳدے، بلوچستان اچ بحران ایوب خان دے دور اچ شروع تھیا، بلوچ سرداراں کوں معاہدے دے تحت پہاڑاں توں واپسی سݙ تے پھانسی ݙتی ڳئی، پاکستان دے وجود تے اے زخم ایوب خان لاتے ہن۔ خمیس کوں قومی اسمبلی اچ بلوچستان اچ جعفرایکسپریس تے دہشت گرداں دے حملہ اتےسکیورٹی فورسز دے کامیاب آپریشن بارے ڳالھ کریندیں ہوئیں انہاں آکھیا جو اساݙی فوج جعفرایکسپریس واقعہ اچ جینویں کاروائی کیتی اے او تعریف دے قابل اے۔ وزیردفاع آکھیا جو گزریل ترائے ݙینھ اچ تھیوݨ آلے واقعے، نہتے مسافراں کوں قومیت دی بنیاد تے اںج کرݨ قابل مذمت تے افسوس ناک اے۔ وزیردفاع آکھیا جو کل لیڈرآف دی اپوزیشن ایں ایوان اچ اساکوں فارم 47 دا طعنہ ݙتے اے طعنہ اوں بندے ݙتے جئیں دے ݙاݙے ملک اچ پہلا مارشل لاء لاتا۔ انہاں آکھیا جو سرفراز بگٹی تاں دہشت گرداں دے خلاف سینہ تان تے کھڑے کیا خیبرپختونخوا داوزیراعلیٰ وی اینویں کھڑے۔ سوات دے قصاب مسلم خان اتے محمودخان کوں کون واپس ڳھن آوݨ چاہندا ہئی۔ انہاں آکھیا جو جعفرایکسپریس واقعہ اچ مسلح افواج دی کارروائی قابل تحسین اتےدہشت گردی دے خلاف جنگ اچ سنگ میل اے۔
