اسلام آباد۔14مارچ (اے پی پی) سپیکر قومی اسمبلی سردار ایاز صادق آکھیا جو ایوان کوں قانون اتے پارلیمانی رویات دے مطابق چلیساں، مذاکرات مسئلے دا ہکو حل ہن، جڈانجو مذاکرات کہیں دی ذات یا ذاتی ایجنڈے دے تحت نئی ملکی فیدے کیتے ہوون۔ جمعے کوں پارلیمنٹ ہاؤس دے مغلیہ گارڈن اچ پودا لاتے شجر کاری مہم شروع کریندیں ہوئیں دی تقریب دے موقع تے میڈیا نال ڳالھ مہاڑ کریندیں ہوئیں انہاں آکھیا جو موسمیاتی تبدیلیاں تھیندی پئں، ایں صورتحال دا تقاضا اےجو ودھ توں ودھ وݨ لاتے ونڄن۔ انہاں آکھیا جو پاکستان دا عالمی سطح تے آلودگی کھنڈاوݨ اچ حصہ ٻہوں ڳھٹ اے پر اساں ساریاں توں ودھ متاثر تھیندے پئیوں۔ ہک سوال دے ولدے اچ انہاں آکھیا جو میݙی ذات کوں وی تنقید دا نشانہ ٻݨایا ویندے اتے میکوں حوالدار آکھیا ویندے جئیں تے میکوں فخر اے۔ حوالدار ݙوسویں ہوندن ہک جیڑھے چوراں کوں پکڑیندن اتے ٻئے او جیڑھے ملک کیتے آپݨی جاناں ݙیندن۔ انہاں آکھیا جو ایف سی دے جیڑھے نینگر شہید تھین او وی حوالدار ہن۔ انہاں آکھیا جو تنقید کیتی ویندی اے جو اے ایوان غیر قانونی اے، اگر اے ایوان غیرقانونی اے تاں کیا اوندی کمیٹیاں غیر قانونی کائنی جئیں دی اے لوک صدارت کریندن اتے تنخواہیں ڳھندن۔ اپوزیشن کوں عوامی مسئلے دے حل نال کوئی دلچسپی کائنی۔ ہک ٻئے سوال دے ولدے اچ انہاں آکھیا جو اپوزیشن ولوں عوامی مسئلے بارے سارے ریکارڈ عوام دے سامھے رکھیساں۔ ایوان کوں قانون اتے پارلیمانی رویات دے مطابق چلیساں، مذاکرات مسئلے دا ہکو حل ہن۔
