اسلام آباد۔14مارچ(اے پی پی) وزیراعظم محمد شہبازشریف نال بوسنیا ہرزیگووینا دے سفیر ایمن کوہوڈاروچ ملاقات کیتی تے جعفر ایکسپریس تے دہشت گردانہ حملے تے بوسنیا ہرزیگووینا دے عوام اتے حکومت دی طرفوں تعزیت کیتی ۔ وزیراعظم دفتر دے میڈیا ونگ توں جاری بیان موجب ملاقات اچ وزیراعظم پاکستان اتے بوسنیا ہرزیگوینا وچال پراݨے برادرانہ تعلقات تے روشنی پاتی تے سابق وزیراعظم محمد نواز شریف دے بوسنیا ہرزیگوینا دے دوریں دا ذکر کیتے۔بوسنیا دے بھراویں تے بھیݨاں سانڳے پاکستان دی مسلسل حمایت دا اعادہ کریندے آکھیےزیراعظم ایں ڳالھ تے زور ݙتے جو موجودہ دوستانہ تعلقات کوں سانجھے طور تے مفید اقتصادی شراکت داری اچ بدالݨ دی بے پناہ صلاحیت موجود اے۔ وزیراعظم بوسنیا اتے ہرزیگوینا دی چیئرپرسن زلجکا کوویجانووک نال گزریل مہینے دبئی اچ عالمی حکومتاں دے سربراہی اجلاس دے موقع تے نتیجہ خیز ملاقات دا وی ذکر کیتے۔ ایمن کوہوڈاروچ اپݨے ملک دی سیاسی قیادت دی طرفوں وزیر اعظم کوں نیک خواہشات اتے تہنیتی پیغامات پڄائے ، انہاں بوسنیا ہرزیگوینا دی ݙوہیں ملکاں وچال تعاون دے مزید ودھارے دی بھرپور خواہش دا اعادہ کیتے تے وزیراعظم کوں ایں سلسلے اچ جاری کوششاں، اقدامات تے تجویزاں دا ݙسائے۔ انہاں جعفر ایکسپریس ٹرین تے دہشت گردانہ حملے تے بوسنیا ہرزیگووینا دے عوام اتے حکومت دی طرفوں وزیراعظم نال تعزیت کیتی۔
