اسلام آباد۔14مارچ(اے پی پی)پاکستان دی مسلح افواج دے ترجمان لیفٹیننٹ جنرل احمد شریف چوہدری آکھیے جو جعفر ایکسپریس واقعہ بھارت دی دہشت گرد ذہینت دا تسلسل اے، مشرقی پڑوسی پاکستان اچ دہشت گردی دا مرکزی اسپانسر اے، حملے دے بعد بھارتی میڈیا جعلی اے آئی ویڈیوز نال کوڑا پروپیگنڈا کھنݙائے اتے دہشت گرداں دی پروپیگنڈا ویڈیوز ݙکھیندا رہے، ایں پوری دہشت گرد کارروائی اچ دہشت گرد افغانستان اچ اپݨے ہینڈلر نال مسلسل رابطے اچ ہن۔ پی آئی ڈی اسلام آباد اچ وزیراعلی بلوچستان دے کٹھے پریس کانفرنس کریندے انہاں آکھیا جو دہشت گرداں منظم انداز اچ کارروائی کیتی، جعفر ایکسپریس واقعہ ٻہوں دشوار گزار علاقے اچ پیش آئے، ٹرین توں پہلے دہشت گرداں دی وݙی تعداد ایف سی چیک پوسٹ تے حملہ کیتے، جتھاں ایف سی دے 3 جوان شہید تھئین۔ دہشت گرداں آئی ای ڈی دی مدد نال ریلوے ٹریک کوں دھماکے نال اݙائے اتے مسافراں کوں لہا تے ٹولیاں اچ تقسیم کیتے، سوشل میڈیا تے ٹرین واقعے دی اے آئی نال جعلی ویڈیوز ٻݨائی گئین، بھارتی میڈیا جعلی اے آئی ویڈیوز تے پروپیگنڈا کریندا رہے۔ جعلی ویڈیوز نال پاکستان دے خلاف بیانیہ ٻݨاوݨ دی کوشش کیتی گئی، بھارتی میڈیا کوڑی ویڈیوز نال ملکی تشخص خراب کرݨ دی کوشش کیتی۔ ترجمان پاک فوج ݙسائے دہشت گرداں 11 مارچ دی رات یرغمالیاں دے ہک گروپ کوں لسانی بنیاد تے چھوڑیے، جیندی کڄھ لاجسٹک وجوہات ہن کیوں جو اتنے لوکاں کوں قابو نئیں کیتا ونڄ سڳدا، ݙوڄھا اے جو انہاں آپݨے آپ کوں انسانیت دوست ہووݨ دا تاثر ݙیوݨا ھا۔انہاں آکھیا جو دہشت گرداں اپݨے کڄھ ٻیلیاں کوں ٹرین تے چھوڑیے اتے وݙی تعداد اچ پہاڑاں تے لڳے ڳن، جنہاں دی نگرانی کرݨ دے بعد سیکیورٹی فورسز انہاں کوں نشانہ ٻݨا تے مکائے اتے اے پہلی واری تھئے۔ ترجمان پاک فوج ݙسائے جو 12 مارچ دی صویل ساݙی فورسز اسنائپرز دے ذریعے دہشتگرداں کوں نشانہ ٻݨائے تاں یرغمالیاں دی ہک ٹولی دہشتگرداں توں بھجݨ اچ کامیاب تھئی ڄیکوں ایف سی دے جواناں ریسکیو کیتے ڄݙاں جو دہشت گرداں دی فائرنگ نال کڄھ یرغمالی شہید وی تھئین۔ انہاں آکھیا جو 12 مارچ دی ݙوپہر کوں اسپیشل سروسز گروپ (ایس ایس جی)دکی ضرار کمپنی آپریشن دی کمان سنبھالی اتے یرغمالیاں اچ ٻیٹھے خودکش بمباراں کوں اسنائپر نال نشانہ ٻݨائے تاں یرغمالی بچ نکلݨ اچ کامیاب تھئین۔ لیفٹیننٹ جنرل احمد شہریف ݙسایا جو ٹرین دے باہرو یرغمالی فرار تھیوݨ اچ کامیاب تھئین اتے ایس ایس جی دی ضرار کمپنی دے جوان انجن دے رستے ٹرین اچ وڑین، ہک ہک بوگی پوری ٹرین کوں دہشت گرداں توں پاک کیتے اتے یرغمال تریمتیں اتے ٻالاں کوں ریسکیو کیتے۔ آپریشن مہارت نال کیتا ڳئے جو کہیں معصوم یرغمالی دی جان نئیں گئی، ڄیڑھیاں شہادتاں تھئین او آپریشن توں پہلے تھئین جو دہشتگرداں 24 گھنٹے اچ کئی یرغمالی شہید کیتن ٻھل او آپریشن ویلھے کہیں کوں نقصان پچاوݨ ڄوڳے نئیں رہے۔ ترجمان پاک فوج آکھیے جو دہشت گرداں کولو غیرملکی اسلحہ اتے آلات موجود ہن، آپریشن اچ بازیاب تھیوݨ آلے مسافراں کوں خوراک ݙتی گئی اتے فورسز دی نگرانی اچ محفوظ مقام تے پچایا ڳئے۔ ترجمان پاک فوج ݙسائے جو تاریخ اچ ٹرین یرغمال ٻݨاوݨ دے جتنے واقعات تھئین اے واقعہ آپریشن سانڳے ودھ کامیاب ترین ھا، جتھاں 36 گھنٹے اچ ٻہوں پریں ڄاہ تے خودکش بمباراں دے ہووݨ دے باوجود پاک فوج، ایئرفورس اتے ایف سی پوری منصوبہ بندی نال اے آپریشن مکمل کیتے۔ اے دہشت گردی دا ہک ٻیا واقعہ اے جیندے تانے بانے پڑوسی ملک افغانستان نال ملدن، اے جمل دا حصہ اے جو اتھاں آوݨ آلیاں تشکیلات دا افغانی حصہ ہوندن، اتھاں ڄیڑھے خودکش بمبار آندن او وی افغانی ہوندن۔ لیفٹیننٹ جنرل احمد شریف چوہدری اسکرین تے تصاویر ݙکھیندے آکھیے جو حال اچ ہلاک خارجی بدرالدین، نائب گورنر صوبہ باغدیس دا پتر ہا، خارجی میجب الرحمٰن افغانستان دی آرمی اچ بٹالین کمانڈر ہا اتے اے پاکستان اچ دہشت گردی کریندا پیا ہا، ایویں ہی بنوں واقعہ تھئے جیندے اچ افغان دہشت گرد ملوث ہن۔ ایویں انہاں کولو ڄیڑھے ہتھیار ملین او وی افغانستان توں ڳھن آئن ٻھل ڄیڑھا واقعہ بلوچستان اچ تھئے اتے ایں توں پہلے تھیوݨ آلے واقعات دا مین اسپانسر مشرقی پڑوسی اے۔ ڈݙی جی آئی ایس پی آر گرفتار بھارتی جاسوس کلبھوشن یادیو دے اعترافی ویڈیو بیانات وی ݙکھائن جیڑھے ݙسیندن جو ایندا ہدف اتے مقصد بلوچستان اچ دہشت گردی کھنݙاوݨ اتے را بلوچ قوم پرستاں نال رل سہولت کاری اتے مدد کرݨ ہا،جتھاں ملٹری طرز دا کنکشن آپریشن کیتا ونڄ سڳے کیوں جو بلوچستان دی تحریک سمندر دے ذریعے نئیں تھیندی، مقصد اے جو بلوچ قوم پرستاں کوں محفوظ زمین ملے اتے سمندر ولوں مکمل کوآرڈینیڈ ہووے۔ ڈی جی آئی ایس پی آر سابق بھارتی آرمی چیف دا بیان وی چلوایا اتے ہتھیار سٹݨ آلے بلوچاں دا بیان وی ݙکھیا جو ” اے کوئی جنگ نئیں صرف اپݨے ذاتی مفادات کیتے عام معصوم بلوچاں کوں مروایا ویندا پئے” انہاں سازشاں اچ بھارت دا ہتھ اے۔ لیفٹیننٹ جنرل احمد شریف چوہدری آکھیا جو جعفر ایکسپریس واقعہ وی ایں سلسلے دی کڑی اے۔ انہاں اللہ دا شکر ادا کیتے اتے سلام پیش کیتے جو بہادر جواناں اپݨی کمال مہارت اتے منصوبہ بندی، دلیری نال ہک ٻہوں خطرناک صورتحال توں معصوم جاناں کوں بچایا۔
