اسلام آباد۔26 مارچ(اے پی پی)پنجویں اتے چھیکڑی ٹی 20 میچ اچ وی میزبان نیوزی لینڈ پاکستان کوں ہرا تے سیریز 4 ہک توں اپݨے ناویں کر ڳھدی اے۔ چھیکڑی ٹی ٹوئنٹی میچ ویلنگٹن ریجنل سٹیڈیم اچ کھیݙیا ڳئے۔ پہلے کھیݙدے ہوئے پاکستانی اوپنر ہکو اری ول ناکام تھی ڳن اتے حسن نواز صفر اتے محمد حارث 11 رنز تے ٹردے تھئین۔ ٻئے کھلاڑی عمیر بن یوسف اتے عثمان خان 7، 7، عبدالصمد 4، جہانداد خان ہک، سفیان مقیم صفر تے پویلین ولین۔ شاداب خان 28 اتے کپتان سلمان آغا 51 رنز ٻݨائن۔ کیویز ولوں جمی نیشم 5، جیکب ڈفی 2، بین سیئرز اتے ایش سودھی ہک ہک وکٹ ڳھدی۔ ولدے اچ اوپنرز دی جارحانہ بیٹنگ پاکستانی بالرز دے چھکے چھڑا ݙتن اتے 128 دا ہدف 2 وکٹاں تے صرف 10 اووراں اچ ہی پورا کر ڳھدے۔ ٹم سیفٹ دھواں دھار 97 نات آئوٹ، فن ایلن 27 اتے مارک چیمپمین 3 رنز ٻݨائن۔ پاکستان ولوں سفیان مقیم 2 وکٹاں ڳھدن۔
