اسلام آباد۔29مارچ(اے پی پی) وفاقی وزیر موسمیاتی تبدیلی اتے ماحولیاتی رابطہ مصدق مسعود ملک ویسٹ مینجمنٹ دے چیلنجز نال نبݨݨ سانڳے ملک گیر کارروائی تے زور ݙتے ۔ پاکستان سودھے پوری دنیا اچ زیرو ویسٹ دا جڳ ݙیھاڑ اتوار 30 مارچ کوں منایا ویسی ۔ اڄوکے سال دا تھیم ’’فیشن اتے ٹیکسٹائل اچ زیرو ویسٹ ‘‘ٹیکسٹائل سیکٹر توں آلودگی مکاوݨ دی اہم لوڑھ کوں اجاگر کریندے ۔ پاکستان دی معیشت اچ ٹیکسٹائل دا شعبہ ھک وݙا حصہ دار اے تے فضلہ دا وی ھک اہم ذریعہ اے۔وفاقی وزیر روزگار اتے جی ڈی پی دی نمو اچ ٹیکسٹائل انڈسٹری دے کردار کوں منیندے چتاوݨی ݙتی اے جو پلاسٹک، الیکٹرانکس اتے خوراک دا فضلہ ھک اہم مسئلہ اے جئیں تے وختی توجہ دی لوڑھ اے ۔ انہاں آکھئے پاکستان فضلہ نال نبݨݨ سانڳے جامع پالیسیاں تے عمل درآمد کریندا پئے۔ انہاں خطرناک فضلہ دے انتظام دی قومی پالیسی (2022) اتے پلاسٹک دی آلودگی تے پاکستان دے قومی ایکشن روڈ میپ کوں پائیداری دے پاسے کلیدی اقدامات دے طور تے پیش کریندے آکھئے حکومت سرکلر اکانومی اچ تبدیلی تے زور ݙیندی پئی اے ، جتھاں فصلے کوں گھٹ کیتا ویندے تے وسائل کوں ول استعمال کیتا ویندے ۔ماحول دوست فیشن، پائیدار پیکیجنگ اتے آندے سرکلر اکانومی پالیسی کوں ودھارا ݙیوݨ آلے اقدامات ایں حکمت عملی دا حصہ ہن۔مصدق ملک پائیدار طریقیں کوں اپناوݨ اچ نجی شعبے کوں رلاوݨ دی لوڑھ تے زور ݙتے تے سول سوسائٹی دے ذمہ دارانہ استعمال کوں ودھارا ݙیوݨ تے زور ݙتے ۔اقوام متحدہ دے پائیدار ترقی دے اہداف (SDG 11 اتے 12) دے نال قومی کوششاں کوں ہم آہنگ کریندے انہاں آکھئے ساݙا ہدف ھک ایجھا مستقبل اے جتھاں فضلہ کوں ٻہوں حد تئیں گھٹ کیتا ونڄے ، وسائل کوں محفوظ کیتا ونڄے تے ساݙا ماحول محفوظ تھیوے۔
