اسلام آباد۔29مارچ(اے پی پی) وزیراعظم دے مشیر رانا ثنا اللہ آکھئے مسلم لیگ (ن) دی قیادت اہم مسئلیں کوں قومی مذاکرات دے ذریعے حل کرݨ سانڳے پرعزم اے ، پارٹی دے سربراہ محمد نواز شریف عید دے بعد ایں اقدام اچ فعال کردار نبھاوݨ سانڳے تیار ہن ۔ ھک نجی نیوز چینل کوں ݙتے ڳئے خصوصی انٹرویو اچ رانا ثنا اللہ ایں ڳالھ تے زور ݙتے جو ملکی چیلنجز نال نبݨݨ سانڳے قومی مذاکرات ہی واحد راستہ اے۔ انہاں سارے سٹیک ہولڈرز تے زور ݙتے جو او کٹھے تھیون تے تعمیری ڳالھ مہاڑ کرن۔ انہاں زور ݙتے جو ملک دی ترقی اتے خوشحالی سانڳے اتحاد اتے ڳالھ مہاڑ ضروری اے تے مسلم لیگ (ن) دی قیادت شمولیت اتے تعاون دے ماحول کوں ودھارا ݙیوݨ سانڳے پرعزم اے۔ رانا ثنا اللہ موجب میاں نواز شریف ترائے ݙھاکیں تے محیط کیرئیر اتے کئی واری بطور وزیراعظم رہ تے پاکستان دی خدمت، ملکی مفادات کوں ترجیح ݙیوݨ تے لوڑھ پووݨ تے سخت فیصلے کرݨ دا مظاہرہ کیتے ۔ انہاں پی ٹی آئی دی حکومت کوں تنقید دا نشانہ بݨیندے آکھئے جو او آپݨے وعدے پورے کرݨ اچ ناکام رہیے ، ملک کوں ڈیفالٹ دے دہانے تے چھوڑ ݙتا۔ انہاں بنیادی ڈھانچے دی ترقی اتے اقتصادی ترقی اچ آپݨی کامیابیاں کوں نشابر کریندے معیشت کوں بچاوݨ دا سہرا مسلم لیگ ن کوں ݙتے۔ رانا دہشت گردی دے خلاف اجتماعی کارروائی دی اہمیت تے زور ݙیندے آکھئے سارے اسٹیک ہولڈرز کوں ایں خطرے نال نبݨݨ سانڳے آپݨا کردار نبھاوݨا چاہیدے۔ انہاں مزید آکھئے جو ھک متحد نقطہ نظر دی لوڑھ اے، جئیں دے تحت لوکاں، گروہ اتے ادارے دہشت گردی دی لعنت روکݨ تے ایں دا مقابلہ کرݨ سانڳے رل تے کم کرن۔
