لاہور ۔29مارچ(اے پی پی) وزیراعظم محمد شہباز شریف قطر دے امیر شیخ تمیم بن حمد الثانی نال ٹیلیفون تے ڳالھ مہاڑ کیتی تے انہاں کوں عید الفطر دے پُرمسرت موقع تے دلی مبارخ ݙتی ۔ وزیراعظم دفتر دے پریس ونگ توں ہفتے کوں جاری اعلامیہ موجب ڳالھ مہاڑ دے دوران وزیراعظم پاکستان اتے قطر وچال نیڑے برادرانہ تعلقات تے اطمینان دا اظہار کریندے سیاسی، اقتصادی اتے ثقافتی سودھے سارے شعبیں اچ ݙو پاسے تعاون کوں مزید ودھاوݨ دا عزم کیتے ۔ وزیرِاعظم اتے امیر قطر وچال اہم عالمی و علاقائی امور تے وی ڳالھ مہاڑ تھئی ۔وزیراعظم محمد شہباز شریف غزہ اچ امن دے قیام سانڳے امیر قطر دے سرگرم و مؤثر کردار اتے خصوصی کوششاں دی تعریف کیتی ۔ شیخ تمیم بن حمد الثانی وزیراعظم دی طرفوں عید دی مبارخ قبول کریندے پاکستانی عوام سانڳے نیک تمناواں دا اظہار کیتے۔ امیر قطر وزیرِاعظم دے دورہ قطر دے دوران منظر آرٹ گیلیری دی افتتاحی تقریب اچ بطور مہمان خصوصی شرکت تے اظہار تشکر کیتے، جݙاں جو وزیرِاعظم ایں نمائش دے انعقاد اتے خصوصی دعوت تے امیر قطر اتے عالی مرتبت شیخہ المیاسہ دا شکریہ ادا کیتے۔ قطر دے امیر وزیرِ اعظم کوں ݙسائے جو پاکستان اچ قطری سرمایہ کاری اتے نجی شعبے دے تعاون دے ودھارے سانڳے اعلی سطح قطری وفد عید دے وختی بعد پاکستان دا دورہ کریسی ۔وزیرِ اعظم پاکستان قطر ثقافتی تعاون اتے ݙوہیں ملکاں وچال پراݨے تعلقات دی تاریخ تے لاہور اچ ھک نمائش کراوݨ دی تجویز ݙتی جیں دا قطری امیر خیر مقدم کیتے۔ وزیرِ اعظم قطر دے امیر عزت مآب شیخ تمیم بن حمد الثانی کوں وختی پاکستان دا دورہ کرݨ دی دعوت وی ݙتی۔
