لاہور۔29مارچ (اے پی پی) وزیراعظم محمد شہباز شریف عمان دے سلطان ہیثم بن طارق نال ٹیلیفون تے رابطہ کیتے تے انہاں کوں عیدالفطر دے پُرمسرت موقع تے مبارخ ݙیوݨ دے نال نیک تمناواں دا اظہار وی کیتے۔ وزیراعظم دفتر دے پریس ونگ توں جاری اعلامیہ موجب آپݨی ڳالھ مہاڑ دے دوران وزیراعظم پاکستان اتے عمان وچال ثقافتی، مذہبی اتے جغرافیائی قربت تے مبنی تاریخی برادرانہ تعلقات دا ذکر کیتے۔ انہاں تجارت، سرمایہ کاری، توانائی، انفارمیشن ٹیکنالوجی اتے دفاع سودھے مختلف شعبیں اچ ݙوپاسے تعاون ودھاوݨ دی خواہش دا اعادہ کیتے ۔ ایں سلسلے اچ وزیراعظم شہباز شریف پاکستان دے وزیر تجارت دے مسقط دے اڄوکے کامیاب دورے تے اطمینان دا اظہار کیتے جئیں توں ݙوہیں فریقین اچ سانجھے تعاون نال شراکت دے نویں موقع ڳولݨ دا رستہ ہموار تھیسی ۔ وزیراعظم عمان دے سلطان کوں پاکستان دا دورہ کرݨ دی دعوت وی ݙتی۔ سلطان ہیثم بن طارق وزیراعظم دی طرفوں عید دی مبارخ قبول کریندے پاکستانی عوام سانڳے نیک تمناواں دا اظہار کیتے۔
