وزیراعظم  شہباز شریف  دا تاجکستان دے صدر امام علی رحمن نال ٹیلیفون تے رابطہ

لاہور ۔29مارچ(اے پی پی) وزیراعظم محمد شہباز شریف تاجکستان دے صدر  امام علی رحمن نال ٹیلیفون تے رابطہ کیتے ۔ وزیراعظم صدر امام علی رحمان کوں عیدالفطردے پُرمسرت موقع تے دلی مبارخ ݙتی تے تاجک عوام دی سلامتی، خوشحالی تے ترقی سانڳے نیک تمناواں دا اظہار کیتے۔ وزیراعظم دفتر دے پریس ونگ توں جاری بیان موجب ڳالھ مہاڑ اچ ݙوہیں رہنماواں ݙو پاسے تعلقات دی موجودہ صورتحال دا جائزہ ڳھدے، تعلقات مزید ودھاوݨ سانڳے آندے سانجھے لائحہ عمل و مصروفیات تے ڳالھ مہاڑ کیتی تے سانجھی دلچسپی دے علاقائی امور تے وی ڳالھ تھئی ۔ وزیراعظم کرغز – تاجک سرحد دی حد بندی متعلق اجوکے معاہدے تے دستخط دی تعریف کریندے صدر تاجکستان کوں ایں کامیابی تے مبارخ ݙتی ۔ وزیراعظم آکھئے جو او تاجکستان اچ مئی 2025 دے چھیکڑ اچ دوشنبے اچ “گلیشئیر دی حفاظت” کانفرنس اچ شرکت دے  منتظر ہن۔ ݙوہیں رہنماواں پاکستان اتے تاجکستان وچال تکڑے تھیندے تعلقات تے اطمینان دا اظہار کیتے انہاں کوں مزید ودھاوݨ دا عزم کیتے ۔ وزیراعظم محمد شہباز شریف صدر امام علی رحمن کوں پاکستان دورے دی دعوت وی ݙتی۔