اسلام آباد۔30مارچ(اے پی پی) صدر مملکت اسلامی جمہوریہ پاکستان آصف علی زرداری پوری قوم تے عالم اسلام کوں عید الفطر دی مبارخ ݙیندے آکھئے خوشی دا اے ݙینھ اساکوں رمضان المبارک دی برکتاں، عبادات اتے تقویٰ دے سفر دے بعد نصیب تھیندے ۔ عیدالفطر اللہ تعالیٰ دا انعام اے جیڑھا جو اللہ اساکوں روزے دی مشقت تے عطا کیتے۔ایوان صدر دے پریس ونگ موجب عید الفطر 1446 ھ / 2025ء دے موقع تے آپݨے سنھیے اچ صدر مملکت آکھئے رمضان المبارک اچ اساں قربِ الٰہی حاصل کرݨ، اپݨے کردار کوں سنوارݨ تے نیکیاں اچ سبقت گھن ونڄݨ دی کوشش کریندوں ۔ اے مہینہ اساکوں صبر، برداشت، عبادت اتے غریباں دی مدد دا درس ݙیندے ۔صدر مملکت زور ݙتے جو ہݨ اے ساݙی ذمہ واری اے جو اساں رمضان المبارک اچ ڳھدی ڳئی ایں تربیت کوں آپݨی روزمرہ زندگی اچ نافذ کروں اتے اپݨی عملی زندگی اچ وی اخلاص، ایمانداری اتے محبت دے جذبات کوں برقرار رکھوں۔ انہاں آکھئے عیدالفطر دے موقع تے اساکوں آپݨے بھیݨ بھراویں کوں یاد رکھݨا چاہیدے جیڑھے معاشی اوکھ دا شکار ہن ۔ اصل خوشی ݙوجھیں نال آپݨیاں خوشیاں ونڈݨ اچ ہے اساکوں چاہیدے جو زکوٰۃ، صدقات اتے فطرانہ ودھ چڑھ تے ݙیوں تاں جو کوئی وی ضرورت مند عید دیاں خوشیاں توں محروم نہ رہے۔اے ݙینھ اساکوں اتحاد اتے یکجہتی دا وی درس ݙیندے جو اساں آپݨی صفاں اچ اتحاد پیدا کروں، ھک ݙوجھے دا سہارا بݨوں تے پاکستان کوں ترقی و خوشحالی دے رستے ٹورݨ اچ آپݨا کردار نبھاؤں ۔ صدر مملکت آکھئے جو اساکوں آپت اچ بھرپی کوں ودھارا ݙیوݨا اے تاں جو ساݙا ملک ھک تکڑی تے خوشحال ریاست دے طور تے ابھرے۔ ایں تے میں اہل مقبوضہ جموں و کشمیر سانڳے وی دعا کرینداں اللہ تعالیٰ انہاں کوں وختی آزادی نال عید نصیب فرماون۔صدر مملکت آکھئے میݙی اللہ تعالیٰ توں دعا اے جو اللہ تعالیٰ ساݙے روزے اتے عبادات قبول فرماون تے پاکستان کوں امن اتے خوشحالی دے رستے تے ٹورن ۔ آمین!
