لاہور ۔30مارچ(اے پی پی) وزیراعظم اسلامی جمہوریہ پاکستان محمد شہباز شریف آکھئے جو عید الفطر دے بابرکت موقع تے میں پوری پاکستانی قوم کوں دلوں عیدالفطر دی مبارخ ݙینداں اے ݙینھ اساکوں خوشی، شکرگزاری، اخوت اتے ہمدردی دا درس ݙیندے ، رمضان المبارک اچ تقویٰ، صبر اتے قربانی دی جیڑھی تربیت اساکوں ملی، اساکوں چاہیدے جو ایں کوں اپݨی زندگیاں اچ رمضان دے بعد وی جاری رکھوں اتے اسلامی اصولاں تے کاربند رہوں۔ وزیر اعظم دفتر دے پریس ونگ موجب وزیرِاعظم اسلامی جمہوریہ پاکستان دا عید الفطر 1446ھ دے موقع تے قوم دے ناویں سنھیے اچ آکھیے جو اڄ پاکستان کوں اندرلے تے ٻاہرلے دشمناں توں خطرہ اے ۔ اساکوں ہر قسم دی انتہا پسندی، نفرت اتے فرقہ واریت توں بچݨا ہوسی، ملک دی سالمیت اتے استحکام سانڳے اساکوں ھک مٹھ تھیوݨا ہوسی تے کہیں وی سازش کوں کامیاب نی تھیوݨ ݙیوݨا ۔وزیر اعظم آکھئے معیشت، معاشرت اتے قومی یکجہتی کوں مستحکم کرݨ اساں ساریں دی سانجھی ذمہ واری اے ۔ حکومت پاکستان ایں ویلھے ملک دی اقتصادی بحالی، امن و امان دے قیام تے سماجی استحکام سانڳے چنڳیاں کوششاں کریندی پئی اے ۔ انہاں آکھئے اساکوں چاہیدے جو اساں ھک مٹھ تھی تے آپݨے ملک کوں ترقی تے خوشحالی دے رستے تے ٹوروں ۔پاکستان دہشت گرداں دے خلاف ھک جنگ توں گزردا پئے تے ساݙی ہماری پاک فوج دے افسر تے جوان ایں ملک اچ امن و امان دی بحالی سانڳے آپݨی جاناں دا نذرانہ پیش کریندے پئن ۔ وزیراعظم آکھئے اڄ دے ݙینھ اساں انہاں سارے شہدا دے اچے درجات سانڳے دعا کریندوں تے انہاں دے خانداناں نال اظہارِ یکجہتی کریندوں ۔ اڄ دے ݙینھ اساں جعفر ایکسپریس دے سانحے دے شہیداں سانڳے وی دعا کریندوں اللہ انھاں دے درجات اُچے کرن انہاں دے پسماندگان دے ݙکھ اچ برابر دے شریک ہیسے ۔ انہاں آکھئے اساکوں آپݨے انہاں مظلوم بھراویں کوں وی یاد رکھݨا چاہیدے جیڑھے ظلم و بربریت دا شکار ہن، خاص طور تے فلسطین اتے بھارتی زیر تسلط مقبوضہ جموں و کشمیر دے مظلوم عوام جیڑھے آزادی دی جدوجہد اچ مصروف ہن۔ وزیراعظم ایں ڳالھ دا اعادہ کیتے جو پاکستان ہمیشہ اُنھاں دے رلے کھڑے تے کھڑا رہسی ۔عالمی برادری کوں چاہیدے جو او انسانی حقوق دی خلاف ورزیاں روکے اتے انہاں بے گناہ مسلماناں دی داد رسی کرے۔وزیر اعظم آکھئے میں پاکستانی قوم توں اپیل کرینداں جو او عید دیاں خوشیاں اچ آپݨے کمزور اتے ضرورت مند بھیݨ بھراویں تے رشتہ داراں اتے ہمسائیں کوں شریک کرن انہاں دی مدد کرن تے ھک فلاحی معاشرہ تشکیل ݙیوݨ اچ آپݨا کردار نبھاون ۔وزیر اعظم آکھئے اللہ تعالیٰ اساکوں ایں بابرکت ݙینھ دے حقیقی پیغام کوں سمجھݨ تے ایں کوں آپݨی عملی زندگی دا حصہ بݨاوݨ دی توفیق عطا فرماوے۔آمین،پاکستان پائندہ باد!
