لاہور۔2اپریل(اے پی پی) وزیراعظم محمد شہبازشریف عید دے موقع تے بنگلہ دیش دے چیف ایڈوائزر پروفیسر ڈاکٹر محمد یونس نال ٹیلی فون تے ڳالھ مہاڑ کیتی تے عید الفطر دی مبارخ ݙتی ۔وزیراعظم دفتر دے میڈیا ونگ توڄ جاری اعلامیہ موجب وزیراعظم محمد شہباز شریف گزریل سال اقوام متحدہ جنرل اسمبلی (یو این جی اے) اتے D-8 سربراہی اجلاس دے دوران نیویارک اتے قاہرہ اچ آپݨی گرمجوش اتے نتیجہ خیز ملاقاتاں دا ذکر کریندے ݙوہیں ملکاں وچال ݙوپاسے تعلقات بالخصوص تجارت اتے سیاحت اچ مثبت رفتارتے آپݨے اطمینان دا اظہار کیتے۔ ݙوہیں رہنماواں پاکستان اتے بنگلہ دیش وچال ݙوپاسے تعلقات مزید تکڑے بݨاوݨ دی آپݨی سانجھی خواہش دا اعادہ کیتے ۔ ایں حوالے نال وزیراعظم اپریل اچ نائب وزیراعظم/وزیر خارجہ پاکستان دے دورہ ڈھاکہ دے حوالے نال اے امید کیتی جو ھک تجارتی وفد وی انھاں دے رلے بنگلہ دیش ویسی ۔ انہاں ساری سطح تے ݙوپاسے تعلقات دی بحالی کیتے ادارہ جاتی نظام کوں بحال کرݨ دی لوڑھ تے زور ݙتے ۔ ݙوہیں ملکاں وچال عوامی رابطے ودھاوݨ سانڳے ثقافتی وفد دے تبادلے تے وی ڳالھ مہاڑ کیتی ڳئی ۔ وزیراعظم بنگلہ دیش توں ھک ثقافتی وفد کوں پاکستان دے دورے تے بھیڄݨ دی تجویز ݙتی جئیں اچ پراݨے تے نویں فنکار بالخصوص لیجنڈ اداکارہ رونا لیلیٰ وی شامل ہوسن۔وزیراعظم محمد شہباز شریف بنگلہ دیش دے چیف ایڈوائزر کوں پاکستان دا دورہ کرݨ دی آپݨی دعوت دا اعادہ وی کیتے
