اسلام آباد۔3اپریل(اے پی پی) پاکستان پیپلز پارٹی دے چیئرمین بلاول بھٹو زرداری آکھیے جو قائد عوام شہید ذوالفقارعلی بھٹو پاکستان کوں ترقی دے رستے تے ٹوریا ، اساں انہاں دے جمہوری، مضبوط اتے خوشحال پاکستان دے خواب نال آپݨی وابستگی دا اعادہ کریندوں ۔ پی پی پی میڈیا سیل توں جاری بیان موجب قائدِ عوام شہید ذوالفقار علی بھٹو دے 46ویں یومِ شہادت دے موقع تے آپݨے سنھیے اچ انہاں آکھیے اڄ دے پُرملال ݙینھ تے اساں شہید ذوالفقار علی بھٹو کوں خراجِ عقیدت پیش کریندوں جیڑھے پاکستان دے پہلے براہِ راست منتخب وزیرِاعظم ہن جنہاں شکست خوردہ قوم کوں مایوسی دی راکھ توں نویں زندگی ݙتی ، جݙاں قوم مایوس ہئی تے پاکستان کوں 1971 اچ ھک زبردست سانحے دا سامݨا ہئی، اوں ویلھے شہید بھٹو فولادی حوصلے نال قیادت سنبھالی۔ بلاول بھٹو آکھیے انہاں ھک کھنڈی ہوئی مملکت کوں سنبھالا ݙتا، عوام دے حوصلے اُچے کیتے تے پاکستان کوں ترقی دے رستے تے ٹور ݙتا ،انھاں دی سفارتی بصیرت توں 90,000 جنگی قیدیاں کوں بھارتی قید توں واپس گھن آیا ڳیا تے شملہ معاہدے دے تحت 5,000 مربع میل دا علاقہ واپس ڳھدا ڳیا ،اے کارنامہ ساݙی تاریخ اچ بےمثال اے۔انہاں آکھیے شہید بھٹو پاکستان دی معیشت، زراعت اتے صنعت اچ انقلاب برپا کیتا، محنت کش طبقے کوں بااختیار بݨایا تے انہاں کوں انہاں دے حقوق ݙیوائے ، انھاں دی انقلابی لیبر ریفارمز اتے زرعی اصلاحات عام آدمی کوں عزت، وقار اتے زمین دی ملکیت ݙتی۔بلاول بھٹوآکھیے جو انہاں پاکستان کوں ھک ترقی پسند اتے متفقہ آئین ݙتا جئیں جمہوریت اتے بنیادی حقوق دی ضمانت ݙتی انہاں دی ایٹمی ٹیکنالوجی اچ خدمات پاکستان دا دفاع تکڑا کیتا تے انہاں دی متحرک خارجہ پالیسی پاکستان کوں مسلم دنیا تے عالمی برادری اچ ھک باوقار آوازعطا کیتی۔انہاں آکھیے اڄ جݙاں اساں انہاں دی عظیم قربانیاں کوں یاد کریندوں تاں اساں انہاں دے جمہوری ، مضبوط اتے خوشحال پاکستان دے خواب نال آپݨی جُڑت دا اعادہ کریندوں ،شہید بھٹو اڄ وی عوام دے دلاں اچ زندہ ہن۔
