اسلام آباد۔4اپریل(اے پی پی) وزیراعظم محمد شہباز شریف آکھیے رمضان ریلیف پیکج دے تحت ڈیجیٹل والٹ دے ذریعے شفاف اتے سوکھے طریقے نال رقماں مستحقین تئیں پُڄاں ،رمضان ریلیف پیکج دے دوران ملݨ آلیاں شکایتاں کوں اڳوں لائحہ عمل بݨاوݨ ویلھے سامݨے رکھیا ویسی ۔ وزیراعظم دفتر دے میڈیا ونگ توں جاری بیان موجب اے ڳالھ انہاں وزیراعظم رمضان ریلیف پیکج 2025 دے حوالے نال جائزہ اجلاس دی صدارت اچ آکھی ۔ اجلاس اچ وفاقی وزیر منصوبہ بندی احسن اقبال ، وفاقی وزیر قومی غذائی تحفظ رانا تنویر حسین ، وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطاء اللہ تارڑ ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیر اعظم دے معاون خصوصی ہارون اختر، گورنر سٹیٹ بینک جمیل احمد، متعلقہ سرکاری افسراں تے رمضان ریلیف پیکج دے حوالے نال معاون نجی کمپنیاں دے نمائندیں شرکت کیتی ۔ وزیراعظم رمضان ریلیف پیکج سانڳے کم کرݨ آلی حکومتی کور ٹیم اتے معاون اداریں دی بہترین کاکردگی دی تعریف کیتی ۔ وزیر اعظم آکھیے جو رمضان ریلیف پیکج دے حوالے نال پہلی واری ڈیجیٹل والٹ متعارف کروایا ڳیا جئیں دے ذریعے شفاف اتے سوکھے طریقہ کار نال رقماں مستحقین تئیں پُڄن ،رمضان پیکیج پورے پاکستان بشمول گلگت بلتستان تے آزاد کشمیر سانڳے بلاتفریق متعارف کروایا ڳیا،ایں پیکیج کوں شفاف بݨاوݨ سانڳے سٹیٹ بینک ، بی آئی ایس پی، پی ٹی اے، نادرا اتے ٻئے معاون اداریں دیاں کوششاں تعریف دے قابل ہن ۔ وزیراعظم آکھیے رمضان ریلیف پیکج دے دوران ملݨ آلیاں شکایتاں کوں اڳوں سامݨے رکھیا ویسی ، ایں ماڈل کوں ٻئی حکومتی سکیماں اچ اپنایا ونڄے ۔اجلاس کوں رمضان ریلیف پیکج 2025 دے حوالے نال بریفنگ ݙتی ڳئی ۔بریفنگ اچ ݙسایا ڳئے رمضان ریلیف پیکج دی 79 فیصد رقم شفاف طریقے نال مستحقین کوں پڄائی ڳئی اے ،وزیراعظم رمضان ریلیف پیکج دے حوالے نال 2224 ملازمین ڈیوٹی تے ہن،رمضان ریلیف پیکج دے حوالے نال کُل 1273 شکایتاں ملیاں جنہاں کوں حل کرݨ سانڳے وختی اقدامات کیتے ڳئے ۔بینکاں تے ٻئے معاون اداریں دی طرفوں ایں پیکیج دی آگاہی دے حوالے نال 6.2 ملین روبو کالز کیتیاں ڳیاں ، 178,700 آؤٹ باؤنڈ کالز کیتیاں ڳیاں جݙاں جو 6.1 ملین ایس ایم ایس بھیجے ڳن،نیشنل ٹیلی کام کارپوریشن دے کال سینٹر توں ایں پیکج دی معلومات دے حوالے نال 126,839 آؤٹ باؤنڈ جݙاں جو 158551 ان باؤنڈ کالاں تھئن ، رمضان پیکیج دے تحت 1.9 ملین ڈیجیٹل ادائیگیاں تھئن 951,191 ڈیجیٹل والٹ استعمال تھئن جݙاں جو ڈیجیٹل نیشن پاکستان دے وژن دی تکمیل دے پاسے اہم قدم اے ،823,653 تریمتاں ڈیجیٹل والٹ استعمال کیتے جݙاں جو2,541 خصوصی لوکاں ڈیجیٹل والٹ دے ذریعے رقماں وصول کیتیاں ،الیکٹرانک ، پرنٹ اتے سوشل میڈیا دے ذریعے رمضان پیکج دی بھرپورآگاہی مہم چلائی ڳئی ۔
