اسلام آباد۔4اپریل(اے پی پی) سپیکر قومی اسمبلی سردار ایاز صادق غزہ اچ اسرائیلی جارحیت دی شدید مذمت کیتی تے 100 توں ودھ بے گناہ فلسطینیاں دی شہادت تے ݙکھ تے افسوس کیتے ۔ آپݨے مذمتی بیان اچ انہاں آکھیے اے حملے انسانی حقوق، عالمی قوانین اتے جنگ بندی دی کھلی خلاف ورزی ہن۔سپیکر قومی اسمبلی خاص طور تے سکولاں اتے شہری آبادی کوں نشانہ بݨاوݨ دی مذمت کریندے آکھئے ایجھے اقدامات انسانیت سوز ہن تے مہذب دنیا دا ضمیر جھنجھوڑݨ سانڳے کافی ہووݨے چاہیدن ، عالمی برادری دی چپ اسرائیل کوں نہتے اتے نشوم فلسطینیاں تے ظلم دی کھلی چھوٹ ݙیندی پئی اے ۔سپیکر سردار ایاز صادق اقوام متحدہ توں مطالبہ کیتے جو او آپݨی سلامتی کونسل دی قرارداداں موجب مسئلہ فلسطین دے منصفانہ اتے دیر تئیں حل سانڳے وختی عملی اقدامات کرے تاں جو مشرق وسطیٰ اچ پائیدار امن ممکن تھی سڳے ۔ انہاں آکھئے پاکستان اپݨے اصولی مؤقف دے تحت فلسطینی عوام دے حقِ خودارادیت دی بھرپور حمایت کریندے تے 1967 توں پہلے دی سرحداں موجب دارالحکومت القدس الشریف نال ھک آزاد فلسطینی ریاست دا قیام ضروری سمجھدے ۔سپیکر قومی اسمبلی واضح کیتے جو پاکستان دی پارلیمنٹ تے عوام مسئلہ فلسطین کوں عالمی، علاقائی اتے پارلیمانی فورمز تے چیندے رہسوں تے فلسطینی عوام دے رلے کھڑے رہسوں۔ سپیکر سردار ایاز صادق شہید فلسطینیاں دے لواحقین سانڳے صبر تے زخمیاں سانڳے وختی صحت دی دعا منڳی۔
