اسلام آباد۔4اپریل(اے پی پی) وفاقی وزیر توانائی اویس احمد خان لغاری آکھیے حکومت توانائی دے شعبے اچ اصلاحات کریندی پئی اے ، 36 آئی پی پیز نال مذاکرات توں 3,696 ارب روپے دا ٻوجھ گھٹ تھئے ݙوجھے آئی پی پیز نال مذاکرات جاری ہن، الیکٹرک سٹی پالیسی دے تحت آندے 10 سالاں دی منصوبہ بندی کیتی ویندی پئی اے ، 6 سال دے اندر گردشی قرضے کوں ختم کرݙتا ویسی تے آندے سلا اچ زیرو تے گھن آیا ویسی ، سارے بجلی دے میٹرز کوں آٹومیٹڈ سسٹم نال بدالیا ویندا پئے ۔ وفاقی وزیر اویس احمد خان لغاری بجلی دی قیمتاں اچ گھٹکی دے حوالے نال بریفنگ اچ اے امید دا اظہار کیتے جو وزیراعظم شہباز شریف دی قیادت اچ حکومت دی مسلسل کوششاں دے نتیجے اچ آندے ترائے چار سالاں اچ بجلی دی قیمتاں اچ مزید کمی آسی جیڑھا جو ملک دی معاشی ترقی اچ اہم کردار نبھیسی ، انہاں آکھیے توانائی دے شعبے اچ بجلی دی پیداواری لاگت ، گردشی قرضے اتے بجلی دی تقسیم کار کمپنیاں (ڈسکوز) دی ناقص کارکردگی ھک وݙا مسئلہ اے ،مستقبل سانڳے مہانگی بجلی مُل نہ گھنݨ دا فیصلہ کیتے ، الیکٹرک سٹی پالیسی دے تحت آندے 10 سالاں دی منصوبہ بندی کیتی ویندی پئی اے ۔ ھک توں ݙو ہفتے اچ پلان وزیراعظم کوں پیش کریسوں ، رحیم یارخان منیاری ٹرانسمیشن لائن کوں نجی شعبے دی شراکت نال مکمل کیتا ویسی ۔ وفاقی وزیر آکھیے سی پیک دے تحت چائنیز پلانٹس اچ کولیں نال بجلی دی پیداوار تے توجہ ݙتی ویسی ، زرمبادلہ ، شرح سود، ایندھن دی قیمتاں ، مہانگے پاور پلانٹس اتے ٹرانسمیشن پلاننگ دی کمی سودھے معاشی اتار چڑھاؤ بجلی دی پیداواری لاڳت کوں ودھائے ۔ انہاں آکھیے ٹرانسمیشن اچ رکاوٹ نہ ہووݨ دی صورت اچ صارفین کوں سستی بجلی وی ݙتی ونڄ سڳدی اے ٹرانسمیشن سسٹم دی رکاوٹاں ہٹاوݨ سانڳے ہر ممکن کوشش کیتی ویسی جئیں توں بجلی دے نرخاں کوں گھٹ کرݨ اچ مدد ملسی ، بجلی دیاں تقسیم کار کمپنیاں (ڈسکوز) دی مرحلہ وار نجکاری کیتی ویسی ۔پہلے مرحلے اچ ترائے ڈسکوز اسلام آباد، فیصل آباد اتے گوجرانوالہ الیکٹرک سپلائی کمپنیاں دی نجکاری کیتی ویسی جݙا جو ݙوجھے مرحلے اچ لاہور، ملتان اتے ہازیکو الیکٹرک سپلائی کمپنیاں دی نجکاری کیتی ویسی۔ انہاں مزید آکھئے حیدرآباد، سکھر اتے پشاور الیکٹرک سپلائی کمپنیاں سانڳے رعایتی ماڈل اپنایا ویسی۔ وفاقی وزیر آکھئے بلوچستان اچ 27000 زرعی ٹیوب ویلاں کوں شمسی توانائی تے بدالݨ سانڳے 55 ارب روپے دی سرمایہ کاری کیتی ویندی پئی اے انہاں مزید آکھئے گڈو اتے نندی پور پاور پلانٹس دی نجکاری وی جاری اے، پاور پلاننگ اینڈ مینجمنٹ کمپنی بݨائی ڳئی اے ، غیر فعال جینکو کوں وی ختم کیتا ویندا پئے آندے 6 سالاں اچ 2.4 ٹریلین روپے دا گردشی قرضہ ختم کرݙتا ویسی۔
