راولپنڈی۔4اپریل(اے پی پی) کورکمانڈرز کانفرنس ہر قیمت تے بلاتفریق دہشت گردی کوں ختم کرݨ دے عزم دا اعادہ کریندے واضح کیتے جو پاکستان کوں غیر مستحکم کرݨ دی کوشش کرݨ آلے ملک دشمن عناصر، سہولت کاراں تے انھاں دی حوصلہ افزائی کرݨ آلیں دے خلاف ریاست پوری طاقت نال نبݨسی ،کہیں کوں وی بلوچستان اچ امن اچ خلل پاوݨ دی اجازت نہ ݙتی ویسی ۔ آئی ایس پی آر موجب آرمی چیف جنرل سید عاصم منیر دی صدارت اچ 268 ویں کور کمانڈرز کانفرنس منعقد تھئی ۔فورم شہداء دے ایصال ثواب سانڳے فاتحہ خوانی کیتی۔ شرکا مادر وطن دے امن و استحکام سانڳے شہداء افواج پاکستان ، قانون نافذ کرݨ آلے اداریں تے شہریاں دی لازوال قربانیاں کوں خراج عقیدت پیش کیتا۔فورم کوں خطے دی موجودہ صورتحال، قومی سلامتی کوں پیش آندے چیلنجز تے ودھدے خطرے دے جواب اچ پاکستان دی حکمت عملی بارے جامع بریفنگ ݙتی ڳئی۔کانفرنس اچ علاقائی اتے داخلی سلامتی دی صورتحال دا تفصیلی جائزہ وی ڳھدا ڳئے ۔ شرکا کانفرنس آکھیے بلوچستان دے استحکام اتے خوشحالی اچ خلل پاوݨ آلے مذموم سیاسی مفادات تے سماجی عناصر کوں بلوچستان دے عوام دی غیر متزلزل حمایت نال فیصلہ کن طور تے ناکام بݨایا ویسی ۔بلوچستان اچ سارے ملکی اتے غیر ملکی عناصر دا اصل چہرہ، گٹھ جوڑ اتے انتشار کھنڈاوݨ تے پروان چڑھاوݨ دی کوششاں پوری طرح نال بے نقاب تھی چکئن ۔ فورم اعادہ کیتے جو ایجھے عناصر اتے ایجھیاں کوششاں کرݨ آلیں کوں کہیں وی قسم دی معافی نہ ݙتی ویسی ۔فورم نیشنل ایکشن پلان دے دائرہ کار دے تحت”عزم استحکام ” دی حکمت عملی دے تکھے تے موثر نفاذ دی لوڑھ تے زور ݙتے ۔فورم دہشت گردی دے خلاف پوری قوم دے تعاون نال مشترکہ نقطہ نظر دی اہمیت کوں اجاگر کیتے ۔شرکا کانفرنس اعادہ کیتے جو ریاستی ادارے آئین دے دائرے اچ رہندے ہوئیں قانون تے پوری استقامت نال عمل درآمد کریسن۔ قانون دی عملداری اچ کہیں قسم دی نرمی اتے کوتاہی نہ ورتی ویسی ۔آرمی چیف پاکستان اچ نیشنل ایکشن پلان دے تحت بݨائے ڳئے ضلعی رابطہ کمیٹیاں دے آغاز دی وی تعریف کیتی ۔آرمی چیف بغیر کہیں رکاوٹ دے نیشنل ایکشن پلان دے تکھے نفاذ دی لوڑھ تے زور ݙیندے آکھئے نیشنل ایکشن پلان دے نفاذ اچ حکومتی ہدایات موجب سارے ادارے پائیدار ہم آہنگی ، مربوط کوششاں اتے تعاون کوں یقینی بݨاون۔ انہاں آکھیے پاک فوج حکومت اتے قانون نافذ کرݨ آلے اداریں کوں دہشت گرداں دی مالی اعانت دےخلاف سخت قانونی اقدامات اچ مکمل تعاون کریسی، غیر قانونی سر گرمیاں دہشت گردی دی مالی معاونت نال اندرلے طور تے جڑیاں ہوئیاں ہن ، پاکستان اچ دہشت گرداں تے انہاں دے سہولت کاراں سانڳے کوئی جاہ کائنی ۔فورم بھارت دی غیر قانونی طور تے مقبوضہ جموں و کشمیر اچ انسانی حقوق دی جاری سنگین خلاف ورزیاں تے تشویش کیتی ۔فورم لائن آف کنٹرول تے بھارتی فوج دی بلا اشتعال جنگ بندی دی خلاف ورزیاں تے وی خدشات ظاہر کیتے۔فورم بھارت دے غیر قانونی طور تے مقبوضہ جموں و کشمیر دے عوام دے منصفانہ حقوق سانڳے پاکستان دی پر زور اتے غیر متزلزل حمایت تے زور ݙتا۔فورم عالمی سطح تے مقبوضہ جموں و کشمیر اچ جاری انسانی حقوق دی خلاف ورزیاں کوں اجاگر کرݨ سانڳے مستقل سفارتی کوششاں دی لوڑھ تے وی زور ݙتے ۔فورم فلسطین دے عوام نال مکمل یکجہتی کریندے غزہ اچ تھیوݨ آلی سنگین انسانی حقوق دی خلاف ورزیاں اتے جنگی جرائم دی شدید مذمت کیتی۔فورم فلسطین دے عوام دی غیر متزلزل سفارتی، سیاسی اتے اخلاقی حمایت ݙیوݨ دا اعادہ وی کیتے ۔ کانفرنس مُکݨ تے آرمی چیف فیلڈ کمانڈرز کوں آپریشنل تیاری اتے پیشہ ورانہ مہارت دے اعلیٰ ترین معیارات کوں برقرار رکھݨ دی ہدایت کیتی ۔ آرمی چیف بہترین جنگی تیاریاں برقرار رکھݨ سانڳے سخت تربیت یقینی بݨاوݨ تے زور ݙتے۔
