اسلام آباد۔5اپریل(اے پی پی) وفاقی وزیر خزانہ محمد اورنگزیب آکھیے قومی معیشت صحیح پاسے اڳوں ودھدی پئی اے ، معاشی استحکام کوں پائیدار معاشی استحکام اچ بدلݨا ہوسی، زرمبادلہ دے ملکی ذخیرے ودھدے پئن ، افراط زر دی شرح مسلسل گھٹ تھیندی پئی اے ، مہانگ دے ثمرات دی عام آدمی تئیں منتقلی یقینی بݨاوݨی اے ،معاشی ترقی دے امکانات اچ 83 فیصد ودھارا تھئے جیڑھا جو گزریل سال 49 فیصد ہئی، مقامی سرمایہ کاری دے ودھارے توں براہ راست غیر ملکی سرمایہ کاری اچ وی ودھارا تھیسی ، شرح سود اچ کمی توں قومی معیشت تے مثبت اثرات پئن ،ملک اچ سرمایہ کاری دے ودھارے سانڳے جامع حکمت عملی دے تحت اقدامات یقینی بݨائے ویندے پئن ، ٹیکسیشن دے امور کوں مزید سوکھا بݨایا ویندا پئے ، ٹیکس محصولات دےدائرہ کاراچ ودھارا کیتا ڳئے ، ایف بی آر دی آٹو میشن توں مثبت نتیجے ملدے پئن ، عیدالفطر تے 870 ارب روپے دی خریداری تھئی ، گزریل سال عیدالفطر تے 720 ارب روپے دی خریداری تھئی ہئی، جاری مالی سال دے پہلے چھی مہینے اچ سیمنٹ دی پیداوار اچ 14 فیصد، کاراں دی فروخت اچ 40 تے موٹرسائیکلاں دی وکامت اچ وی 30 فیصد ودھارا تھئے ۔ ایں پروگرام کوں آئی ایم ایف دا چھیکڑی پروگرام بݨاوݨ سانڳے ڈھانچہ جاتی اصلاحات تے مکمل عملدرآمد ضروری اے۔ وزیر خزانہ محمد اورنگزیب اے ڳالھ پریس کانفرنس کریندے آکھی اے ۔ انہاں آکھیے مہانگ گھٹ تھیوݨ دے اثرات عام آدمی کوں منتقل تھئن، معیشت صحیح پاسے ودھدی پئی اے تے معاشی استحکام کوں پائیدار معاشی استحکام اچ بدلݨا ہو سی۔ انہاں آکھیے زرمبادلہ دے ذخیرے اچ مسلسل ودھارا تھیندا پئے تے افراط زر دی شرح گھٹ تھیندی پئی اے ۔ انہاں آکھیے مہانگ دے ثمرات دی عام آدمی تئیں منتقلی یقینی بݨاوݨی اے ،ضروری چیزاں دیاں قیمتاں دی نگرانی سانڳے ادارہ جاتی نظام بݨیندے پیوں ۔ وزیر خزانہ آکھیے کاروباری اعتماد دے اشاریے سودھے سرمایہ کاراں دے اعتماد تے صارفین دے اعتماد دے اشاریے وی قومی معیشت دی بہتری اتے معاشی استحکام کوں ظاہر کریندن ۔ انہاں آکھیے کاروباری برادری دے اعتماد دے اشاریے دییاں رپورٹا اساں تیار نی کیتیاں بلکہ اے مختلف عالمی اداریں دیاں رپورٹاں ہن انہاں پی ڈبلیو سی دی سروے رپورٹ دا حوالہ ݙیندے آکھیے ملک دے ٹاپ چیف ایگزیکٹو افسران آکھیے معاشی ترقی دے امکانات اچ 83 فیصد ودھارا تھئے جیڑھا جو گزریل سال 49 فیصد ہئی ، مقامی سرمایہ کاراں دا اعتماد بہتر تھیندا پئے تے ایں حوالے نال متعدد اداریں دیاں رپورٹاں وی ظاہر کریندن جݙاں مقامی سرمایہ کاراں دا اعتماد بہتر تھیسی او سرمایہ کاری کریسن تاں پاکستان اچ براہ راست غیر ملکی سرمایہ کاری وی ودھ ویسی ۔ محمد اورنگزیب آکھیے بینکنگ سیکٹر معیشت اچ اہم کردار دا حامل اے۔ انہاں آکھیے سٹیٹ بینک آف پاکستان دی طرفوں پالیسی ریٹ اچ کمی توں معیشت تے مثبت اثرات پئن۔ وفاقی وزیر خزانہ آکھیے ملک اچ سرمایہ کاری دے ودھارے سانڳے جامع حکمت عملی دے تحت اقدامات یقینی بݨائے ویندے پئن ۔ وفاقی وزیر خزانہ محمد اورنگزیب آکھیے ہݨ سارے پاکستانی تنخواہ دار شہری گھراں اچ ٻہہ تے ٹیکس فائل کرسڳسن ، کہیں وکیل دی لوڑھ نہ ہوسی ، ٹیکسیشن دے امور سوکھے بݨیندے پیوں ٹیکس سسٹم اچ شفافیت گھن آوݨ سانڳے انسانی مداخلت گھٹ توں گھٹ کرتے ٹیکنالوجی دے ذریعے ٹرانسپیرنٹ سسٹم متعارف کراوݨ ضروری اے ۔ انہاں آکھیے اساں 24 سرکاری کاروباری اداریں (ایس ای اوز) کوں نجکاری کمیشن دے حوالے کرݙتے ، خسارے اچ ونڄݨ تے خزانے کوں مسلسل ضیان پڄاوݨ آلے انہاں اداریں دی نجکاری کیتی ویسی ، پی آئی اے دی ول نجکاری کیتی ویسی ۔وفاقی وزیر خزانہ امید دا اظہار کیتے جو ݙوجھا مرحلہ ثمرآور ثابت تھیسی کیوں جو ہݨ یورپی روٹس وی کھل چکئن تے روزویلٹ ہوٹل دے حوالے نال وی ڳالھ کیتی ونڄ سڳدی اے۔ شرح سود 22 فیصد توں گھٹ تے 12 فیصد رہ ڳئی اے، جیں توں صنعت کاراں کوں فیدہ تھیندا پئے ۔ بزنس کانفیڈنس، کنزیومر کانفیڈنس دے حوالے نال جیڑھیاں ڳالھیں کیتیاں ویندیاں پئن انہاں دے حوالے نال بزنس کانفیڈنس انڈیکس بہتر تھیوݨ دا دعویٰ حکومت نی بلکہ ھک آزادانہ سروے اچ کیتا ڳئے ۔محمد اورنگزیب آکھیے سٹاک مارکیٹ اچ نویں سرمایہ کار آندے پئن ، مارکیٹ اچ مزید بہتری ݙٹھی ویندی پئی اے تے عیدالفطر تے اقتصادی سرگرمیاں اچ خاطر خواہ ودھارا تھئے ۔ وزیر خزانہ آکھیے اڄوکے سال ترسیلات زر دے محصولات 36 ارب ڈالر توں ودھݨ دی امید اے ، برآمدات ودھدیاں پئن جون دے چھیکڑ تئیں ملک دے زرمبادلہ دے ذخیرے 13 ارب ڈالر تھی ویسن ایں ویلھے ایل سی کھولݨ تے کمپنیاں کوں منافع ٻاہر بھجواوݨ اچ کوئی اوکھ کائنی ۔ہ مہانگ اچ کمی عوام تئیں منتقل تھیوݨی چاہیدی اے ، کابینہ دی اقتصادی رابطہ کمیٹی مہانگ اچ کمی سانڳے اقدامات کریندی پئی اے ، ای سی سی مہانگ تے خاص نظر رکھی ہوئی اے، ای سی سی مہانگ دی مانیٹرنگ سانڳے نویں اقدامات وی کیتن ۔ پہلی ششماہی اچ سیمنٹ دی پیداوار اچ 14 فیصد ودھارا جݙاں جو پہلی ششماہی اچ کاراں دی فروخت اچ 40 فیصد اتے موٹرسائیکلاں دی فروخت اچ 30 فیصد ودھارا تھئے ۔وزیر خزانہ آکھیے آئی ایم ایف نال سٹاف لیول معاہدہ تھی ڳئے اساں آئی ایم ایف دے اسٹرکچرل بینچ مارک حاصل کیتن ایں دفعہ قومی مالیاتی معاہدہ اتے زرعی انکم ٹیکس وصولی سانڳے اقدامات کیتے ڳئن پاکستان پہلی واری سٹرکچرل بینچ مارک حاصل کیتن ۔،پہلی واری حاصل اہداف سانڳے صوبیں وی اقدامات کیتن امید اے آئی ایم ایف دے ایگزیکٹو بورڈ دی طرفوں ھک ارب ڈالر دی ݙوجھی قسط وختی منظور کیتی ویسی ۔ انہاں آکھیے ایں پروگرام کوں آئی ایم ایف دا چھیکڑی پروگرام بݨاوݨ سانڳے ضروری اے ڈھانچہ جاتی اصلاحات تے مکمل عملدرآمد کیتا ونڄے اساں ٹیکس ٹو جی ڈی پی شرح کوں 10.8 فیصد تئیں ودھائے ، ایف بی آر اچ ڈیجیٹلائزیشن نال فیدے ملدے پئن وزیر خزانہ آکھیے کھنڈ ، کھاد، تماخوں اچ ٹریک اینڈ ٹریس سسٹم دا مکمل اطلاق کرݙتا ڳئے تے سیمنٹ سیکٹر اچ ایندا اطلاق کیتا ویندا پئے۔
