اسلام آباد۔5اپریل(اے پی پی) پاک بحریہ دے جہاز (پی این ایس) اصلت کمبائنڈ ٹاسک فورس151(سی ٹی ایس۔151)دی معاونت اچ صومالیہ دے مشرقی ساحل توں پرے بحیرہ عرب اچ انسداد قزاقی گشت دا آغاز کیتے، سی ٹی ایس۔151 دی قیادت ایں ویلھے پاکستان نیوی کریندی پئی اے ۔ ڈائریکٹوریٹ جنرل پبلک ریلیشنز (پاک بحریہ) دی طرفوں جاری پریس ریلیز اچ آکھیا ڳئے پاکستان نیوی دی قیادت اچ سی ٹی ایس۔151 خلیج عدن، سوکوترا گیپ دے آس پاس اتے صومالیہ دے مشرقی ساحل اچ بحری قزاقی دے خطرے توں چوکس رہیندے خطے اچ آپݨی موجودگی ودھاوݨ سانڳے فعال اقدامات کریندی پئی اے ۔ انہاں کوششاں دا مقصد بحری قزاقی، مسلح ڈکیتی تے ٻئے غیر قانونی سرگرمیاں کوں روکݨا اے تاں جو اہم سی لائنز آف کمیونیکیشن (SLOCs) دی حفاظت یقینی بݨائی ونڄ سڳے ۔پی این ایس اصلت دی تعیناتی بحری قزاقی اتے مسلح ڈکیتی نال نبݨݨ سانڳے پاک بحریہ دے پکے عزم کوں ظاہر کریندی اے ، ایں دے نال نال عالمی میری ٹائم کامنز دی حفاظت اتے خطے اچ میری ٹائم تجارت دے آزادانہ بہاؤ کوں یقینی بݨیندی اے۔
