لاہور۔6اپریل(اے پی پی) غیر قانونی تارکین دے انخلا دی حکومتی مہم دے تحت انخلا دا عمل بلا تعطل جاری اے۔ترجمان پنجاب پولیس موجب انخلا مہم دے دوران 1336 لوکاں کوں متعلقہ اداریں دی مدد نال ملک توں ڈی پورٹ کیتا ڳئے، گزریل 24 گھنٹے اچ 2772 توں ودھ غیر قانونی رہݨ آلے غیرملکیاں کوں ہولڈنگ سنٹرز پڄایا ڳئے۔ انہاں ݙسائے جو 2810غیر قانونی رہݨ آلے غیر ملکی لوک پہلے توں ہولڈنگ پوائنٹس تے موجود جݙاں جو غیر قانونی تارکین دے انخلا سانڳے صوبے اچ 46 ہولڈنگ سنٹرز بݨئے ڳئن ۔ آئی جی پنجاب ڈاکٹر عثمان انور آکھیے سارے غیرقانونی رہݨ آلے غیرملکی تارکین کوں ہرصورت واپس بھجوایا ویسی ،غیر قانونی رہݨ آلے شہریاں دے پنجاب توں انخلا دے دوران سکیورٹی ہائی الرٹ اے۔ متعلقہ اداریں نلا کوآرڈینیشن توں تارکین وطن کوں مخصوص پوائنٹس توں پنجاب دی حدود توں ٻاہر منتقل کیتا ویندا پئے ۔ ڈاکٹر عثمان انور آکھیے منتقلی سانڳے ٹرانسپورٹ، لاجسٹکس، کھاوݨ پیوݨ سودھے ٻئے انتظامات متعلقہ ضلعی انتظامیہ دی ذمہ واری اے، آئی جی پنجاب سی سی پی او لاہور، سارے آر پی اوز اتے ڈی پی اوز کوں غیر قانونی رہݨ آلے تارکین دے انخلا دے عمل کوں تکھا کرݨ دی ہدایت کریندے آکھیے ایں سلسلے اچ سپیشل برانچ، سی ٹی ڈی، سکیورٹی ادارے، انٹیلی جنس بیسڈ انفارمیشن دے ذریعے غیر قانونی رہݨ آلے غیر ملکیاں دی نشاندہی کریندے پئن ، آئی جی ہدایت کیتی جو غیر قانونی رہݨ آلے غیر ملکی لوکاں دی میپنگ، سکینگ، سکریننگ موجب چیکنگ کیتی ونڄے انہاں آکھیے انخلا دے عمل دے دوران انسانی حقوق دی پاسداری یقینی بݨائی ویندی پئی اے ، سارے ریجنل اتے ڈسٹرکٹ پولیس افسرانخلا دے عمل دے دوران ضلعی انتظامیہ، متعلقہ اداریں نال کوآرڈینیشن رکھن
