اسلام آباد۔6 اپریل(اے پی پی) وزیراعظم محمد شہباز شریف آکھیے حکومت کھیݙاں دی قومی فیڈریشنزاچ شفافیت، جوابدہی اتے پیشہ وارانہ مہارت یقینی بݨاوݨ سانڳے اصلاحات متعارف کرویندی پئی اے ،کھیݙ، قومی ترقی، نوجواناں کوں بااختیار بݨاوݨ تے عالمی سطح تے پاکستان دی شناخت اجاگر کرݨ دا ھک موثر ذریعہ ہن ، قومی کھیݙ پالیسی تلویں سطح تے ٹیلنٹ دی ڳول ، صنفی مساوات اتے ہمہ گیری کوں ودھارا ݙیوݨ تے مرکوز اے۔ کھیݙاں دے جگ ݙیھاڑ برائے ترقی و امن دے موقع تے آپݨے پیغام اچ انہاں آکھیے ترقی تے امن سانڳے کھیݙاں دے جگ ݙیھاڑ دے موقع تے پاکستان، مثبت تبدیلی دے ودھارے ، رکاوٹاں مکاوݨ تے سرحداں توں ماورا اتحاد سانڳے کھیݙاں دی اہمیت کوں منیندے ، بین الاقوامی برادری نال یکجہتی دا اظہار کریندے ۔وزیراعظم آکھیے کھیݙ، قومی ترقی، نوجواناں کوں بااختیار بݨاوݨ تے عالمی سطح تے پاکستان دی شناخت اجاگر کرݨ دا ھک موثر ذریعہ ہن تے ایہا وجہ اے جو ساݙی حکومت کھیݙاں کوں اپݨے ترقیاتی ایجنڈے دا مرکزی ستون قرار ݙتے ساݙی قومی کھیݙ پالیسی تلویں سطح تے شمولیت، ٹیلنٹ دی تلاش، صنفی مساوات اتے ہمہ گیری کوں ودھارا ݙیوݨ تے ہے۔ انہاں آکھیے ارشد ندیم / شہباز شریف ہائی پرفارمنس اکیڈمی جیھے اقدامات دے ذریعے ساݙا ہدف نوجوان کھلاڑیاں کوں سائنسی بنیاداں تے تربیت، مالی معاونت اتے جدید سہولتاں ݙیوݨ دے ذریعے مستقبل دے چیلنجز سانڳے تیار کرݨا اے ۔ اساں ایں ڳالھ تے یقین رکھیندوں جو بہتر انتظام تکڑیاں کھیݙاں دی بنیاد اے۔ حکومت کھیݙاں دی قومی فیڈریشنز اچ شفافیت، جوابدہی اتے پیشہ ورانہ مہارت یقینی بݨاوݨ سانڳے اصلاحات متعارف کرویندی پئی ے تاں جو ادارہ جاتی نظم و نسق کوں بہتر بݨایا ونڄ سڳے ، کھلاڑیاں دے انتخاب اچ میرٹ کوں مقدم رکھیا ونڄ سڳے تے کھیݙاں دے میدان اچ اخلاقی اقدار کوں ودھارا ݙتا ونڄ سڳے ۔ملک گیر تربیتی کیمپاں دے انعقاد توں گھن تے 2026 اچ 14ویں ساؤتھ ایشین گیمز دی تیاری تئیں، پاکستان خطے اچ کھیݙاں دی مہارت اتے سیاحت دا مرکز بݨݨ سانڳے پُرعزم اے۔ وزیراعظم سارے اسٹیک ہولڈرز بشمول سول سوسائٹی اتے ترقیاتی شراکت داراں توں اپیل کیتی جو تعلیم، صحت، ترقی اتے امن متعلق پالیسیاں اتے پروگراماں اچ کھیݙ کوں مؤثر انداز نال شامل کرن۔وزیراعظم آکھیے آؤ سارے رل تے آپݨے کھیݙاں دے نظام کوں تکڑا کروں تے آوݨ آلیاں نسلاں سانڳے ھک زیادہ جامع، بااختیار اتے پائیدار معاشرہ تشکیل ݙیوں
