راولپنڈی۔7اپریل(اے پی پی) سکیورٹی فورسز دے ڈیرہ اسماعیل خان اچ آپریشن دے دوران ٻہوں مطلوب دہشت گرد سرغنہ شیرین سودھے 9 دہشت گرد ماریے ڳئن ۔ آئی ایس پی آر موجب 6 تے 7 اپریل 2025 دی وچلی رات سکیورٹی فورسز خفیہ اطلاعات دی بنیاد تے ضلع ڈیرہ اسماعیل خان دے عمومی علاقے ٹکوارہ اچ خوارج دی موجودگی دی اطلاع تے کارروائی کیتی۔ کارروائی دے دوران سکیورٹی فورسز خوارج دے ٹھکاݨے کوں موثر اندازاچ نشانہ بݨائے ۔ شدید فائرنگ دے تبادلے دے نتیجے اچ 9 خوارج، جنھاں اچ ہائی ویلیو ٹارگٹ اتے خوارجی نیٹ ورک دا سرغنہ شیرین وی شامل ہئی، جہنم واصل کرݙتے ڳئن ۔ ہلاک دہشت گرداں توں اسلحہ اتے گولہ بارود وی برآمد کرڳھدا ڳئے ۔خوارجی سرغنہ شیرین قانون نافذ کرݨ آلے اداریں کوں ٻہوں ساریاں دہشت گرد کاروائیاں اچ مطلوب ہئی او بے گناہ شہریاں دی ٹارگٹ کلنگ اچ ملوث ہووݨ دے نال 20 مارچ 2025 کوں شہید تھیوݨ آلے کیپٹن حسنین اختر شہید دی شہادت دا وی ذمہ وار ہئی۔ایں کارروائی اچ ایں سفاک فعل دا بدلہ گھن ڳھدے تے مرکزی مجرم کوں کیفرکردار تئیں پڄا ݙتا ڳئے ۔علاقے اچ کلیئرنس آپریشن جاری اے تاں جو کہیں وی لکیے ہوئے خوارجی کوں انجام تئیں پڄایا ونڄ سڳے ۔آئی ایس پی آر آکھیے پاکستان دی سکیورٹی فورسز ملک توں دہشت گردی دے ناسور کوں منڈھوں مکاوݨ سانڳے پرعزم اے۔
