تاشقند۔7اپریل(اے پی پی) چیئرمین سینیٹ سید یوسف رضا گیلانی ازبکستان دے صدر شوکت مرزایوف نال ملاقات کیتی تے ݙوہیں ملکاں وچال ݙوپاسے تے پارلیمانی تعلقات کوں تکڑا بݨاوݨ متعلق امور تے ڳالھ مہاڑ کیتی ۔ سینیٹ سیکرٹریٹ توں جاری اعلامیہ موجب اے ملاقات تاشقند اچ تھیوݨ آلے بین الپارلیمانی یونین دی 150ویں اسمبلی اتے متعلقہ اجلاساں دے موقع تے تھئی ۔چیئرمین سینیٹ پاکستان دے عوام اتے قیادت دی طرفوں گرمجوشی نال خیرسگالی دے جذبات پڄائے تے آئی پی یو اسمبلی دے کامیاب انعقاد اتے اڄوکے پارلیمانی انتخابات دی کامیاب تکمیل تے صدر ازبکستان کوں دلوں مبارخ ݙتی ۔ ݙوہیں رہنماواں پاکستان اتے ازبکستان وچال صدیاں تے محیط مذہبی، ثقافتی تے تاریخی رشتے دا اعتراف کیتے تے ݙوپاسے تعاون کوں سارے شعبیں اچ ودھاوݨ دا سانجھا عزم کیتے ۔ ایں موقع تے وزیراعظم شہباز شریف دے فروری 2025 اچ ازبکستان دے اڄوکے دورے دا خصوصی حوالہ وی ݙتا ڳئے جئیں دوران مفاہمتی یادداشتاں تے دستخط تھئے تے اعلیٰ سطحی سٹریٹجک تعاون کونسل دے قیام تے اتفاق کیتا ڳئے ۔ چیئرمین سینیٹ لاہور تے تاشقند وچال براہ راست پروازاں دی بحالی دی تعریف کریندے ایں کوں عوامی رابطے تے کاروباری تعلقات دے ودھارے سانڳے ھک اہم قدم قرار ݙتے۔ ݙوہیں رہنماواں پاکستان اتے ازبکستان وچال ودھدے سیاسی و ادارہ جاتی رابطے دا جائزہ ڳھدا، جنھاں اچ ݙو پاسے سیاسی مشاورت اتے مشترکہ وزارتی کمیشنز دے باقاعدہ اجلاس، نیز اقتصادی تعلقات دے ودھارے سانڳے منعقدہ مشترکہ کاروباری فورمز شامل ہن۔سید یوسف رضا گیلانی پارلیمانی تعاون کوں تکڑا بݨاوݨ تے اڄوکے انتخابات دے بعد پارلیمانی دوستی گروپس دی نویں سروں تشکیل تے زور ݙتا۔ انہاں آکھیے ایں طرح دے تبادلے سفارتی اعتماد کوں ودھاوݨ تے علاقائی و عالمی سطح تے سانجھے تعاون کوں ممکن بݨیندن ۔ملاقات اچ اقتصادی و تجارتی تعلقات تے وی تفصیلی ڳالھ مہاڑ تھئی ݙوہیں فریقین ایں ڳالھ دی تعریف کیتی جو مالی سال 2023-24 دے دوران ݙو پاسے تجارت 105 ملین امریکی ڈالر توں ودھ ڳئی ۔ انہاں اے عزم کیتے جو آندے سالاں اچ تجارتی حجم کوں 2 ارب امریکی ڈالر تئیں پڄاوݨ دیاں کوششاں جاری رکھیاں ویسن ۔ فریقین ٹرانس-افغان ریلوے پراجیکٹ اتے انٹرنیشنل ملٹی موڈل ٹرانسپورٹ کوریڈور (ITC-BRKUAP) جیھے سٹریٹجک منصوبیں دی بھرپور حمایت دا اظہار کیتے جنہاں دا مقصد خطے دی یکجہتی ودھاوݨ تے بحیرہ عرب تئیں رسائی حاصل کرݨِ اے۔چیئرمین سینیٹ انہاں راہداری منصوبیں اچ ازبکستان دی شمولیت کوں خوش آئند قرارݙتے تے پاکستان دی طرفوں فیزیبلٹی اتے تعمیراتی مرحلے اچ سانجھے تعاون نال اڳوں ودھݨ دی خواہش ظاہر کیتی ۔ملاقات اچ ویزا سہولتاں وی اہم موضوع رہیے ۔ چیئرمین سینیٹ ازبکستان دے کیتے ڳئے اقدامات دی تعریف کیتی تے سانجھی تجارت، سیاحت اتے اقتصادی رابطے ودھاوݨ سانڳے ویزا پالیسیاں اچ نرمی دی ضرورت تے زور ݙتے ۔ چیئرمین سینیٹ یوسف رضا گیلانی حکومتِ ازبکستان دی میزبانی تے شکریہ ادا کیتے تے ݙوہیں ملکاں دے سانجھے مفاد تے علاقائی خوشحالی سانڳے سٹریٹجک شراکت داری کوں مزید مستحکم بݨاوݨ دے پاکستان دا پکا عزم کیتے بعد چ چیئرمین سینیٹ سید یوسف رضا گیلانی 150ویں آئی پی یو اسمبلی اچ سماجی انصاف سانڳے عالمی پارلیمانی اقدام تے زور ݙتا ۔چیئرمین سینیٹ تاشقند، ازبکستان اچ تھیوݨ آلی 150ویں بین الپارلیمانی یونین (آئی پی یو) اسمبلی توں خطاب اچ آکھیے سماجی ترقی اتے انصاف سانڳے پارلیمانی اقدامات اتے تعاون دے ذریعے عالمی سطح تے نویں عزم دی لوڑھ اے ۔پارلیمانی اقدام سماجی ترقی و انصاف دے عنوان توں تھیوݨ آلے اجلاس اچ چیئرمین سینیٹ شمولیتی اتے مساوی معاشریں دی تشکیل اچ پارلیمان دے کردار کوں اجاگر کیتے ۔چیئرمین سینیٹ دیاں دیاں پارلیماناں تے زور ݙتے او انصاف دے ودھارے تے ہمہ گیر ترقی یقینی بݨاوݨ سانڳے مشترکہ تعاون ودھاون ۔ چیئرمین سینیٹ عالمی تعاون، سماجی مساوات، اتے ایجھی قانون سازی کیتے پاکستان دے غیر متزلزل عزم دا اعادہ کیتے جیڑھا سارے انساناں دے حقوق دی علمبردار ہووے۔ھک منصفانہ معاشرہ الفاظ توں نی ، عمل نال بݨدے۔
