اسلام آباد۔8اپریل(اے پی پی) وفاقی وزیر توانائی سردار اویس احمد خان لغاری نال ترک وزیر توانائی و قدرتی وسائل آلمپارسلان بیئریکٹر ملاقات کیتی۔ ملاقات اچ ݙوہیں ملکاں وچال توانائی دے شعبے اچ تعاون کوں مزید ودھاوݨ تے ڳالھ مہاڑ کیتی۔ ترجمان پاور ڈویژن توں جاری اعلامیہ موجب مطابق ترک وزیر توانائی ترکیہ اچ بجلی دے تقسیم کار نظام دے پرائیویٹائزیشن دے عمل اتے ایں دے موجودہ خدوخال متعلق ݙسائے۔ انہاں ترک کمپنیاں دی طرفوں پاکستان اچ جاری بجلی تقسیم کار کمپنیاں دے پرائیویٹائزیشن دے عمل اچ دلچسپی اتے ترکیہ اچ اڄوکے سال روڈ شو کرݨ متعلق وی ݙسائے ۔ سردار اویس لغاری ترک وزیر توانائی دا ترکیہ دے پرائیویٹائزیشن دے عمل اتے ایندے تکنیکی نکات بارے تفصیلی بریفنگ تے شکریہ ادا کیتے۔ انہاں وفد کوں پاکستان اچ جاری نجکاری دے عمل بارے ݙسیندے ݙسائے جو نجکاری دے عمل کوں شفاف طریقے نال مکمل کرݨ سانڳے فنانشل ایڈوائزر دی تقرری کرݙتی ڳئی جنہاں دی طرفوں اڄوکے سال جولائی تئیں جامع تجویزاں آوݨ دے امکانات ہن ،ایں ضمن اچ کئی روڈ شو وی پلان کیتے ویسن جئیں اچ ترکیہ وی شامل اے ۔وفاقی وزیر اویس لغاری ترکیہ نال توانائی دے شعبے اچ نویں منصوبیں اچ تعاون دی اہمیت تے زور ݙتے جݙاں جو ترک وزیر پاکستان دی توانائی دی ضرورتاں کوں پورا کرݨ سانڳے تکنیکی مہارت اتے سرمایہ کاری ݙیوݨ دی پیشکش کیتی۔ملاقات اچ ݙوہیں ملکاں وچال توانائی دے شعبے اچ تکڑی تے پائیدار شراکت داری بݨاوݨ دا عزم کیتا ڳئے۔
