اسلام آباد۔9اپریل(اے پی پی) وفاقی وزیر صحت سید مصطفی کمال آکھیے وزیر اعظم شہباز شریف دی بنیادی ترجیح شعبہ صحت اے، زچگی دے دوران سالانہ 10ہزار ماواں اپݨی جاناں ونڄا ٻہندن ،38فیصد ٻال غذائی قلت نال زندگی گزریندے پئن ۔ اے ڳالھ انہاں صحت دے جڳ ݙیھاڑ دی مناسبت نال عالمی ادارہ صحت دے اہتمام نال منعقدہ تقریب توں خطاب کریندے آکھی ۔ انہاں آکھیے زچگی دے دوران سالانہ 10ہزار ماواں ، دوران حمل 400 ماواں آپݨی جاناں ونڄا ٻہندن ، ایں سانڳے ساݙا آغاز صحتمندانہ کائنی لیکن اساں پرامید ہیسے۔ انہاں آکھیے اساں آپݨے ذرائع صحیح پاسے استعمال کریسوں۔ 38فیصد ٻال غذائی قلت نال زندگی گزریندے پئن ۔ ایجھے ٻال معاشرے دی ذمہ واری ہن ، او نوکریاں نی گھن سڳدے او تعلیم گھنݨ دے قابل نی ہوندے ، اساکوں صحت اچ طبی سہولتاں دی ذمہ واری چاوݨی پوسی ۔ انہاں آکھیے وزیر اعظم شہباز شریف دی بنیادی ترجیح شعبہ صحت اے ۔ھک وی لمحہ اتے موقع ضائع نی تھیوݨ ݙیندے ، اساں پیدائشی ٻالاں دے محفوظ آغاز سانڳے کم کریسوں ۔ آندے ݙینھاں اچ معاشرہ صحت مند ہوسی۔ انہاں آکھیے میں جئیں ݙینھ عہدہ سانبھیے ایں ݙینھ ڈاکٹرلو ڈپنیگ نال ملاقات کیتی ، آے آپݨی ذمہ واریاں بہترین طریقے نال نبھیندے پئن ۔ اے وزرات اساں کیتے پُھلاں دی سیجھ کائنی بلکہ چیلنجز توں بھرپور اے۔ انہاں آکھیے لوکاں دی تکلیف تے اوکھ مکاوݨ سانڳے اساں تے باری ذمہ واری اے اساں جوابدہ تھیوݨا اے،آؤ کٹھے رل تے کم کریندوں تے انسانی زندگیاں بچاوݨ سانڳے جیڑھیاں تے کمزوریاں ہن انہاں کوں مُکیندوں۔ ایں موقع تے ڈبلیو ایچ او پاکستان دے نمائندے ڈاکٹر ڈپینگ لؤ وی تقریب توں خطاب کیتا۔
