اسلام آباد۔9اپریل(اے پی پی) الیکشن کمیشن 23 نویں تعینات الیکشن افسراں سانڳے 13 ہفتے تے مشتمل سروس ٹریننگ دا آغاز کرݙتے ۔ ترجمان الیکشن کمیشن توں جاری اعلامیہ موجب الیکشن کمیشن اکیڈمی اچ 9 اپریل توں شروع تھیوݨ آلے تربیتی پروگرام دا اختتام 4 جولائی 2025ء کوں تھیسی ۔چیف الیکشن کمشنر سکندر سلطان راجہ تربیتی پروگرام دا باقاعدہ افتتاح کیتا جݙاں جو افتتاحی تقریب اچ معزز ممبران الیکشن کمیشن وی شریک تھئن۔ چیف الیکشن کمشنر اپݨے افتتاحی کلمات اچ نویں افسراں کوں الیکشن کمیشن اچ تعیناتی تے مبارخ ݙتی تے خیر مقدم کیتے۔ انہاں افسراں تے واضح کیتے جو انہاں دا انتخاب خالصتاً میرٹ دی بنیاد تے تھئے تے ایں تے انہاں کوں ماݨ ہووݨا چاہیدے ۔ انہاں آکھیے انتخابات دا انعقاد ھک اوکھا عمل اے ۔ جئیں دے موثر انعقاد سانڳے آئین، قانون رولز تے کوڈ آف کنڈکٹ دی جانکاری اتے عملی تجربہ ضروری اے۔ انہاں آکھیے تربیتی پروگرام اچ تساکوں انتخابی قوانین، حلقہ بندیاں، ووٹر رجسٹریشن، پولنگ دے طریقہ کار تے ٻئے دفتری امور دی انجام دہی متعلق تربیت ݙتی ویسی تے جتھاں تئیں ممکن ہوسی عملی تجربے تے مظاہرہ جات وی کروائے ویسن ۔ مزید اے جو تربیت دے دوران افسراں کوں جدید ٹیکنالوجی دے استعمال متعلق وی آگاہی ݙتی ویسی تاں جو دوران سروس اتے عملی زندگی اچ ٹیکنالوجی کوں استعمال کرسڳن ۔ اپݨے اختتامی کلمات اچ چیف الیکشن کمشنر نویں افسراں کوں قوم دی خدمت، آئین وقانون موجب سرکاری امور دی انجام دہی تے عوام نال خوش اخلاقی نال پیش آوݨ دی تلقین کیتی تے ٹریننگ تے توجہ مذکور کرݨ تے وی زور ݙتے
