اسلام آباد۔10اپریل(اے پی پی) وزیراعظم محمد شہباز شریف اڄ توں جمہوریہ بیلاروس دا 2 ݙینھ دا سرکاری دورہ کریسن ، دورے اچ ݙوہیں ملکاں وچال تعاون مزید تکڑا بݨاوݨ سانڳے ٻہوں سارے معاہدے تے مفاہمتی یادداشتاں تے دستخط تھیسن۔ وزیراعظم دفتر دے میڈیا ونگ توں جاری بیان موجب وزیراعظم بیلاروس دے صدرالیگزینڈر لوکاشینکو دی دعوت تے 10 توں 11 اپریل 2025 تئیں ݙو ݙینھ دا سرکاری دورہ کریندے پئن ۔ اے دورہ نومبر 2024 اچ صدر لوکاشینکو دے پاکستان دے اہم دورے دے بعد ݙوہیں ملکاں دے تعلقات اچ اہم سنگ میل اے۔ اپݨے قیام دے دوران وزیراعظم سانجھی دلچسپی دے شعبیں اچ پیشرفت دا جائزہ گھنݨ سانڳے صدر لوکاشینکو نال ملاقات کریسن ۔ ایں حوالے نال ݙوہیں ملکاں وچال پچھلے چھی مہینے دے دوران اعلیٰ سطحی ݙوطرفہ تبادلیں دا ھک سلسلہ جاری اے جئیں اچ فروری 2025 اچ مشترکہ وزارتی کمیشن (JMC) دا 8 واں اجلاس اتے اپریل 2025 اچ پاکستان توں ھک اعلیٰ سطحی مخلوط وزارتی وفد دا بیلاروس دا دورہ شامل ہن ۔ ایں دورے دے دوران ݙوہیں ملکاں وچال تعاون کوں مزید تکڑا بݨاوݨ سانڳے ٻہوں سارے معاہدیں تے مفاہمتی یادداشتاں دا تبادلہ وی تھیسی۔ وزیراعظم دا دورہ پاکستان تے بیلاروس وچال تکڑے تے جاری شراکت داری کوں اجاگر کریندے۔
