اسلام آباد۔10اپریل(اے پی پی) سپیکرقومی اسمبلی سردار ایاز صادق نال اقتصادی تعاون تنظیم (ای سی او) دے سیکرٹری جنرل ڈاکٹر اسد مجید خان ملاقات کیتی جئیں اچ ای سی او رکن ملکاں دی پارلیماناں اچ رابطے کوں ودھارا ݙیوݨ تے سانجھی دلچسپی دے امور تے ڳالھ مہاڑ کیتی ۔سپیکر قومی اسمبلی ڈاکٹر اسد مجید خان کوں ای سی او دے سیکرٹری جنرل دا عہدہ سنبھالݨ تے مبارخ ݙتی تے آکھیے پارلیمانی سفارتکاری ای سی او رکن ملکاں کوں نیڑے گھن آوݨ اچ اہم کردار ادا کر سڳدی اے ،ای سی او رکن ملکاں دے پارلیماناں اچ نیڑے تعاون، خطے دی ترقی اتے پائیدار امن اچ کلیدی اہمیت دا حامل اے۔ انہاں آکھیے پاکستان دی قومی اسمبلی اقتصادی تعاون تنظیم دی پارلیمانی اسمبلی دی فعال اتے سرگرم ممبر اے،پاکستان دی قومی اسمبلی کوں ای سی او دی پارلیمانی اسمبلی دی جنرل کانفرنس ڈی ݙو واری میزبانی کرݨ دا اعزاز حاصل اے،ای سی او دی پارلیمانی اسمبلی دا عبوری سیکرٹریٹ پاکستان دی قومی اسمبلی اچ قائم اے۔سپیکر قومی اسمبلی سیکرٹری جنرل ای سی او کوں قومی اسمبلی اچ قائم عبوری سیکرٹریٹ کوں مستقل سیکرٹریٹ بݨاوݨ سانڳے کردار ادا کرݨ دا آکھیے انہاں قومی اسمبلی اچ قائم پارلیمانی فرینڈ شپ گروپس ای سی او رکن ملکاں وچال پارلیمانی رابطے کوں ودھارا ݙیوݨ اچ فعال کردار ادا کریندے پئن ۔سیکرٹری جنرل ای سی او ڈاکٹر اسد مجید خان سپیکر قومی اسمبلی دا شکریہ ادا کیتے تے اقتصادی تعاون تنظیم دے رکن ملکاں دی پارلیماناں اچ رابطے کوں ودھارا ݙیوݨ اچ سپیکر سردار ایاز صادق دے کردار دی تعریف کیتی ۔ انہاں سپیکر قومی اسمبلی کوں ای سی او دی پارلیمانی اسمبلی دے سیکرٹریٹ کوں مستقل کرݨ سانڳے کردار ادا کرݨ دا یقین ݙیوائے۔
